अमेरिकी राष्ट्रपति डोनाल्ड ट्रम्पले अमेरिकी अनुदानमा सञ्चालन गरेकामध्ये केही कार्यक्रमलाई ठगी (फ्रड) भनेपछि यसमाथि बहस बढ्न थालेको छ।
संसदमा सांसदहरूले निरन्तर यो विषयमा कुरा उठाएका छन्।
अर्थमन्त्रालयले भने उनले फ्रड भनेर तोकेका कार्यक्रम डिजाइनको चरणमा मात्रै रहेको र अनुदान प्राप्त नभएको जानकारी गराएको छ।
'ट्रम्पले जुन कार्यक्रमलाई फ्रड भने त्यो कार्यक्रम नेपालमा अहिले डिजाइनको चरणमा मात्रै छ, अनुदान प्राप्त भएको छैन। तर, यहाँ धेरैको बुझाइ रकम प्राप्त गरेर दुरूपयोग गरेको भन्ने देखिएको छ,' अर्थमन्त्रालयका एक अधिकारीले भने।
नेपालको वित्तीय संघीयता सम्बन्धी कार्यक्रमको लागि दुई करोड डलर, जैविक विविधता संरक्षण सम्बन्धी कार्यक्रमको लागि एक करोड ९० लाख डलर सहयाता दिने विषयलाई ट्रम्पले फ्रड भनेका थिए।
अर्थमन्त्रालयले सोमबार एक विज्ञप्ति जारी गर्दै यी दुई सहित तीन कार्यक्रम डिजाइनको चरणमा रहेको तर अनुदान नै उपलब्ध नभएको जनाएको छ।
'जैविक विविधता, प्रदेश एवं स्थानीय शासन सुदृढीकरण कार्यक्रम र जलवायु उत्थानशील नगरपालिका सेवा कार्यक्रम गरी तीन वटा कार्यक्रम डिजाइनको क्रममा रहेकोमा अहिले यी कार्यक्रम पनि रोकिएको अवस्था छ। डिजाइनको क्रममा रहेका उल्लेखित कार्यक्रमहरूको लागि सम्झौता नभइसकेकोले कुनै पनि सहयोग प्राप्त नभएको..' अर्थमन्त्रालयका प्रवक्ता श्याम भण्डारीले जारी गरेको विज्ञप्तिमा उल्लेख गरिएको छ।
सोझै वित्तीय संघीयताको नाममा भने युएसएआइडीबाट कुनै पनि कार्यक्रम सञ्चालन नभएको अर्थमन्त्रालयले जनाएको छ।
