गत सातादेखि २६ सयको विन्दुमा कडा प्रतिरोध खेपिरहेको नेप्से परिसूचक यो तह उक्लिएको छ।
आइतबार बजार बन्द हुने बेलामा नेप्से परिसूचक २६.५३ अंकले बढेर २६२२ मा पुगेको हो। एक साता अघिदेखि नेप्से २६ सय विन्दुमै स्थिर जस्तै रहेको थियो।
सेयर बजार बढेपनि कारोबार रकम केही घटेको छ। गत बिहीबार बजारमा सात अर्ब ६६ करोड रूपैयाँको कारोबार भएकोमा आइतबार सात अर्ब १२ करोड रूपैयाँमा सीमित भएको छ।
ब्रोकरहरूले भने बजारमा असारमसान्तको प्रभाव सकिँदै गएको अनुमान गरेका छन्।
‘आइतबार बढेको बजार हेर्दा असारमसान्त प्रभाव सकिँदै गएको हो की जस्तो देखिन्छ,’ एक ब्रोकरले भने, ‘त्यसो भएमा असार अन्त्यसम्म बजार बढ्न सक्छ, त्यसपछि भने कम्पनीहरूको वित्तीय विवरण कस्तो आउँछ त्यही अनुसार बजारले बाटो समात्छ।’
असारमा बैंक तथा वित्तीय संस्थाहरू कर्जा असुलीमा लागिरहेका छन्। सेयर धितोमा ऋण लिएकासँगै धेरैले किस्ता तिर्ने गर्छन्। यसले गर्दा बजारमा दबाब रहने र घट्ने मानिन्छ। यस्तो दबाब सकिएपछि भने बजार बढ्ने गर्दै आएको छ।
मूल्य घट्दा सेयर धितोमा लिएको कर्जाको धितो थप्न पर्ने अवस्थाबाट जोगिन पनि यो समय सेयर मूल्य बढाउने गरिरहेको कतिपयको बुझाई छ। त्रैमाशअन्त्यमा यदी बैंकमा धितोमा राखिएको सेयरको मूल्य घटेमा धितो थप्न पर्ने हुन्छ।
आइतबार भने सेयर बजारमा कारोबारमा आएका ३२८ सेयर मध्ये दुई सय ३८ वटाको मूल्य बढेको छ भने ८१ वटाको मूल्य घटेको छ।
सप्तकोशी डेभलपमेन्ट बैंकको सबैभन्दा धेरै ९.९९ प्रतिशतले मूल्य बढेको छ। बढेर सर्किट लागेको यस कम्पनीको सेयरको अन्तिम कारोबार एक हजार ९५ रूपैयाँमा भएको हो।
जोशी हाइड्रोपावर कम्पनीको सेयर मूल्य सबैभन्दा धेरै ५.५७ प्रतिशतले घटेर ३२७ रूपैयाँमा कारोबार भएको छ।
साहास उर्जाको सबैभन्दा धेरै ५७ करोड ८६ लाख रूपैयाँको कारोबार भएको हो।
