मुखमा आएको गाँस खोसिएपछि तिला गाउँपालिका-४ जुम्लाका रामकृष्ण उपाध्याय यतिबेला निकै पीडामा छन्।
असोज ३१ देखि कात्तिक १ गतेसम्म परेको अविरल वर्षाले कात्तिक २ गते भीषण बाढी आयो। त्यसले उनको १० भारी धानमात्र क्षति भएन, खेत नै बगरमा परिणत भएको छ।
सोही वडाका लालबहादुर सार्की र कर्णबहादुर हमालको घर नै बाढीले बगाउँदा उनीहरूको बिचल्ली भएको छ।
तीन वर्षदेखि प्यारालाइसिस रोगले थलिएका कर्ण सुनारको कमाइ खाने खेत नै नदीमा परिणत भएपछि उनको परिवारमा ठूलो सन्ताप परेको छ। तातोपानी गाउँपालिका-४ जुम्लाका देवीकृष्ण उपाध्यायको पनि धानखेत बगरमा परिणत भएका छन्।
बाढीले तातोपानी गाउँपालिका-४ स्थित नेत्रज्योति मावि, वडा नं ७ को दुर्गा मावि मधु सुर्की सर्मी, ८ को कालिका मावि टोप्ला र तिला गाउँपालिका–४ नुवाकोटको सेतीवाडा मावि जुम्ला क्षतिग्रस्त बनाउँदा हाल त्यहाँको पठनपाठन ठप्प भएको छ।
यसले बालबालिका र अभिभावक समस्यामा परेका छन् भने काठ र निर्माणाधीन झोलुङ्गे पुल बगाउँदा आवातजावत ठप्प भएको छ।
तिला गाउँपालिका-४ जुम्ला साँपुल्ली गाउँका स्थानीय वीरबहादुर सिंहले विसं १९८४ सालमा ठूलो क्षति भयो भन्ने सुनिए पनि यस्तो क्षति नभएको बताए।
'कात्तिक २ गतेको बाढीले गरेको क्षतिबाट धेरै घर परिवार सुकुम्बासी बन्ने अवस्था छ। वर्षभरिको मुख्यबाली धान सखाप परेपछि यो वर्ष भोकमरीले सताउने चिन्ता यहाँका नागरिकलाई बढेको छ', उनले भने।
सोही गाउँपालिका-४ नुवाकोट गाउँस्थित सेतीवाडा माविका शिक्षक यज्ञप्रसाद उपाध्यायले प्राकृतिक विपत्तिले करोडौंको क्षति गर्दा पनि संघ र प्रदेश सरकार नपुगेको गुनासो गरे।
'बाढीले विद्यालय सञ्चालन गर्ने अवस्था छैन', शिक्षक उपाध्यायले दुखेसो पोख्दै भने, 'विद्युत्, घर, कुटानी, पिसानी मिल, पुल, स्याउ बगैंचा, पुर्खाले आर्जेको खेतीयोग्य जमिन सबै बगाएर लगेको छ। यस्तो पीडामा पनि माथिल्लो तहका सरकार नजिक आएका छैनन्।'
स्थानीय गणेशकुमारी सिंहले यो वर्षको धानबाली बाढीले विनाश गरे पनि अर्को बाली लगाउला भन्ने आशा सकिएको बताइन्।
'बाढीले खेतमा मात्रै पुरेको भए पनि एक दुई वर्ष लगाएर खेत बनाउन सकिन्थ्यो होला', सिंहले भनिन्,'खेतमा नदी बगिरहेको छ, अब के गर्ने ? सरकारले हाम्रो दुःखमा सान्त्वना दिन पनि पुगेन।'
यता जुम्ला ‘क’ बाट निर्वाचित कर्णाली प्रदेशसभा सदस्य नरेश भण्डारी नेतृत्वको टोलीले अविरल वर्षाका कारण जुम्ला जिल्लामा उत्पन्न विपद् व्यस्थापनार्थ राहत र विशेष पुनर्स्थापना प्याकेज अविलम्ब कार्यान्वयन गर्न, कर्णाली लोकमार्गको अविलम्ब कालोपत्र गर्ने कार्यका लागि संघीय सरकारलगायत सम्बद्ध निकायसँग आवश्यक पहल, समन्वय गर्न मुख्यमन्त्री महेन्द्रबहादुर शाहीलाई अनुरोध गरेको छ।
जुम्लालगायत कर्णाली प्रदेशमा ई–टिकेट प्रणाली लागू गर्न, नियमित उडान भर्न, पारदर्शिता सुनिश्चित गर्न, हवाई क्षेत्रमा भइरहेको अनिमियतता रोक्न र जुम्लास्थित विमानस्थलको शीघ्र स्तरोन्नति गर्ने कार्य अगाडि बढाउनसमेत मुख्यमन्त्री शाहीको ध्यानाकर्षण गरेको प्रदेश सभा सदस्य भण्डारीले जानकारी दिए।
वर्षाले दर्जनौं घर भत्केका छन्। नदी किनारमा रहेका हजारौं भारी खेतीयोग्य जमिन बाढीले बगर बनाएपछि अहिले यहाँका स्थानीयले पुर्पुरोमा हात राख्नुपरेको छ। दर्जनौं काठका साँघु, स्याउ बगैँचा, सामुदायिक विद्यालय र खानेपानी, विद्युत् आयोजना बगाएर लगेको जुम्ला जिल्ला विपद् व्यवस्थापन समितिका अध्यक्ष एवं प्रमुख जिल्ला अधिकारी विजयाकुमारी प्रसाईंले जानकारी दिइन्।
'हामीले बाढीले गरेको प्रारम्भिक क्षतिबारे स्थानीय सरकारसँगको समन्वय सहकार्यमा प्रदेश तथा संघ सरकारलाई पठाइसकेका छौं', प्रमुख जिल्ला अधिकारी प्रसाईंले भनिन्, 'विस्तृत विवरणका लागि विषयगत कार्यालय, गैसस तथा सम्बन्धित सरोकारवाला सम्मिलित प्राविधिक टोली क्षतिग्रस्त ठाउमा परिचालन गरिएको छ।'
कर्णाली प्रदेश सरकारको कात्तिक ५ गते बसेको विपद् परिषद्को बैठकले एक हप्ताभित्र अविरल वर्षाका कारण आएको बाढीपहिरो जस्ता प्राकृतिक विपदबाट भएको सम्पूर्ण क्षति यकिन गरी पठाउन यहाँका १० वटै जिल्ला प्रशासन कार्यालयलाई निर्देशन दिइसकेको छ।
बाढी पहिरोलगायत प्राकृतिक विपद्का कारण मृत्यु भएका परिवारलाई विपद् जोखिम बीमा उपलब्ध गराउने निर्णय गरिएको प्रदेश सरकारका प्रवक्ता एवं आन्तरिक मामिला तथा कानुन मन्त्री सीताकुमारी नेपालीले जानकारी दिइन्। (रासस)
