शेष घले नेतृत्वको गैरआवासीय नेपाली संघ (एनआरएनए) उच्चस्तरीय समितिले महेश श्रेष्ठ नेतृत्वको एनआरएनएलाई नगद तथा जिन्सी हस्तान्तरण गरेको छ।
ललितपुरमा आयोजित कार्यक्रममा एनआरएनए उच्चस्तरीय समितिका सदस्य कुल आचार्यले अध्यक्ष श्रेष्ठलाई नगद तथा जिन्सी सहितका अन्य डकुमेन्ट हस्तान्तरण गरेका हुन्।
गत वैशाखमा घले नेतृत्वको उच्चस्तरीय समितिले गरेको एकता महाधिवेशनबाट महेश श्रेष्ठ अध्यक्ष निर्वाचित भएका थिए।
उच्चस्तरीय समितिले श्रेष्ठ नेतृत्वको कार्यसमितिलाई ८३ लाख ६२ हजार २ सय २८ रुपैयाँ हस्तान्तरण गरेको छ। त्यस्तै, २ वटा कम्प्युटर र एउटा प्रिन्टरसहित अन्य डकुमेन्टहरू समेत समितिले श्रेष्ठ नेतृत्वको कार्यसमितिलाई हस्तान्तरण गरेको छ।
हस्तान्तरण कार्यक्रममा बोल्दै उच्चस्तरीय समितिका सदस्य रहेका आचार्यले एनआरएनलाई एकताबद्ध बनाउनुपर्नेमा जोड दिए।
उनले बलियो र एकताबद्ध एनआरएनले मात्र गैरआवासीय नेपालीका मुद्दालाई सम्बोधन गर्न सक्ने बताए।
त्यस्तै, एनआरएनए अध्यक्ष श्रेष्ठले सर्वोच्च अदालतमा ६ वटा मुद्दा विचाराधीन भएकाले आफूहरूले सोचे अनुसारको काम गर्न नपाएको बताए।
'हाम्रो गतिमा ब्रेक लागिरहेको छ। तर अदालतको फैसलाले हामीलाई छिट्टै काम गर्न सहज बनाउँछ। हामी आधिकारिक हो भन्नेमा कुनै अलमल छैन,' उनले भने, 'अक्टोबरमा अधिवेशन गर्न खोज्नु मूर्खता हो। हामी वैधानिक भएकाले सर्वोच्चको फैसला अनुसार नै हामी हाम्रो कार्यालय जान्छौं।'
कार्यक्रममा जुममार्फत् बोल्दै उच्चस्तरीय समितिका संयोजक एवम् पूर्वअध्यक्ष शेष घलेले सामाजिक कामका लागि कसैले प्रतिबन्ध लगाउन नसक्ने बताए।
'हामीले अधिवेशन गर्दागर्दै पनि प्रतिबन्ध लाग्छ कि भन्ने त्रास थियो। त्यो बेला हामीले जोखिम उठाएरै काम गरेको हो,' उनले भने, 'अब यो कार्यसमितिलाई काम गर्न कसैले रोक्न सक्दैन। सामाजिक काममा सर्वोच्च अदालतले पनि केही गर्ने भन्ने हुँदैन।'
-1755241369.jpg)
-1746009348.jpg)
