एनअारएनको युवा संयोजकमा शाहको उम्मेदवारी


गैरआवासीय नेपाली संघ एनआरएनको आगामी कार्यकालका लागि अष्ट्रेलिया निवासी स्वतन्त्रप्रताप शाहले ग्लोबल युथ कोअर्डिनेटर (युवा संयोजक)मा उम्मेद्वारी दिने घोषणा गरेका छन्।

युवाको नेतृत्व विकास आफ्नो प्रमुख एजेन्डा भएको वताउने शाह विश्वभरका नेपाली युवा शिपलाई नेपालका युवासम्म लैजाने र उनीहरुसँगको सहकार्यबाट देशको विकासमा योगदान दिने योजना आफुले तयार पारेको बताए।

एनआरएन अष्ट्रेलियाको उपाध्यक्ष भई तीन कार्यकाल काम गरिसकेका शाहले आगामी कार्यकालका लागि युवाको नेतृत्व गर्ने, युवाहरु मिलेर नै दोश्रो पुस्ताका प्रवासी नेपालीको निम्ति नयाँ भिजन अघि ल्याउने अठोट समेत व्यक्त गरे।

अष्ट्रेलियाको क्वीन्सल्याण्ड निवासी शाह नेपाल पर्यटन बोर्डका क्वीन्सल्याण्ड प्रतिनिधि पनि हुन्।

‘वास्तवमा एनआरएनलाई युवा ऊर्जाको खाँचो छ। यो ऊर्जालाई सही रूपमा परिचालन गर्न नसक्ने हो भने दोश्रो र तेश्रो पुस्ताका नेपालीहरु यो संस्थाप्रति आकर्षित हुन सक्दैनन्’, उनले भने।

विश्वमै छरिएर रहेका नेपाली मूलका युवाहरुलाई नेपालको निम्ति केही गर्नुपर्छ भन्ने भावना जगाउनको लागि पनि आफ्नो उम्मेद्वारीले थप सहयोग पुग्ने उनको तर्क छ।

Share:

© 2017 Setopati Sanchar Pvt. Ltd.