लोकदोहोरी गीत 'कश्मीरे पछ्यौरी' युट्युबको ग्लोबल ट्रेन्डिङमा परेको छ।
सात महिनाअघि सार्वजनिक गीत युट्युबको विश्वव्यापी ट्रेन्डिङमा उत्कृष्ट १०० म्युजिक भिडिओको सूचीमा ९८ नम्बरमा छ।
गीतमा निश्चल दवाडीको शब्द/संगीत, बाबुकृष्ण परियार र दिपिका बयम्बुको स्वर छ। यो गीत रिलिज हुनासाथ चलेको थिएन्।
६ महिनापछि मात्रै गीतको युट्युब भ्युजले गति लिन थालेको थियो। अहिले यसको भिडिओको भ्युज २ करोड नजिक पुगिसकेको छ।
सामाजिक सञ्जाल टिकटक र फेसबुक रिल्समा गीतका टुक्कामा भिडिओ बन्ने क्रम बढेसँगै गीतको चर्चा चुलिएको हो। सरल शब्द र सुहाउँदो संगीतका साथै ग्रामीण परिवेशमा निर्माण गरिएको भिडिओका कारण गीतले चर्चा पाएको देखिन्छ।
गीतको भिडिओमा गायक बाबुकृष्ण र मोडल केपिना गोतामेले अभिनय गरेका छन्। मौसम हिमालीको कथा एवं निर्देशनमा भिडिओ बनेको हो। यो गीतमा आम स्रोता-दर्शकदेखि चर्चित सेलिब्रेटीहरूले समेत भिडिओ बनाएका छन्।
