बलिउड अभिनेता शाहरूख खान र दीपिका पादुकोण अभिनीत फिल्म 'पठान' चर्चामा छ।
शाहरूखको ५ वर्षपछि यसै फिल्ममार्फत कमब्याक गर्दैछन्। त्यसैले फिल्म प्रतिक्षित बनेको छ। यहाँसम्म कि फिल्मको ट्रेलर कहिले सार्वजनिक हुन्छ भनेर दर्शक पखाईमा छन्।
फिल्ममा समावेशी गीत ‘बेशरम रंग’ मा अभिनेत्री दीपिका पादुकोणको पहिरन र पहिरनको रंगले हिन्दु धर्मको अपमान गरेको भन्दै आपत्ति जनाइएको छ।
यसैबीच फिल्मको प्रदर्शन मिति पछि धकेलिने खबर बाहिरिएको छ।
अभिनेता तथा समीक्षक कमाल आर खान (केआरके) ले ट्वीटरमार्फत फिल्मको मिति सारिने जानकारी दिएका हुन्।
‘पठानको नाम परिवर्तन हुने पक्का भइसक्यो। फिल्ममा गेरू रंगको बिकिनी हुने छैन। निर्माताहरूले फिल्मको प्रदर्शन मिति सार्ने निर्णय गरेका छन्। आज या भोलि आधिकारिक घोषणा हुनेछ,’ उनले लेखेका छन्।
अभिनेताबाट फिल्म समीक्षक बनेका केआरके बलिउड कलाकारमाथि विवादित प्रतिक्रिया दिएर चर्चामा आउने गर्छन्। उनले शाहरूख खानलाई टिकटक स्टार समेत भनिसकेका छन्।
‘पठान’ को ट्रेलर सार्वजनिकमा गरिएको ढिलाइले केआरकेको दाबीलाई बलियो बनाएको छ।
यो फिल्म जनावरी २५ मा प्रदर्शन हुने बताइएको थियो।
सिद्धार्थ आनन्दले निर्देशन गरेको फिल्ममा शाहरूख र दीपिकासँगै जोन अब्राहमको पनि मुख्य भूमिका छ।
