गायक तथा अभिनेता प्रकाश सपुतको फिल्म 'वसन्त' चैतमा प्रदर्शनमा आउने तयारीमा छ।
उनले पहिलोपटक निर्देशन गरेको यो फिल्मको पहिलो गीत गत महिना सार्वजनिक गरियो।
प्रकाश स्वयं र शान्तिश्री परियारको स्वर रहेको ‘साँझ पर्यो झमक्क' बोलको सो गीतले राम्रो चर्चा पायो। यसपछि फिल्मको टिजर समेत सार्वजनिक भइसकेको छ।
यो फिल्ममा अन्य केही गीतहरू समेत समावेश हुनेछन्। सुगम पोखरेल, देबेन्द्र बब्लु, समीक्षा अधिकारी, देवी घर्ती लगायतले यो फिल्मका लागि स्वर दिएका छन्।
स्रोतका अनुसार यो फिल्मको कुनै एक गीतका लागि गायिका विष्णु माझी पहिलो रोजाइमा थिइन्। उनलाई गाउन दिने योजनासहित निर्माण टिमले प्रस्ताव लगेको थियो। 'तर पारिश्रमिक लगायत अन्य विषयमा कुरा नमिल्दा सहकार्य हुन सकेन्,' स्रोतको भनाइ छ।
लोकदोहोरी गायनमा निकै रूचाइएकी विष्णु माझीले पछिल्लो समय बाहिरी गीत गाएकी छैनिन्। दसैंको छेकोमा सार्वजनिक 'परदेशी मेरो परदेशी' उनको पछिल्लो गीत हो।
उनी नेपालकी सर्वाधिक महंगी गायिकामा पर्छिन्। दुई वर्ष अघिसम्म उनलाई २ लाख पारिश्रमिक दिएर थुप्रैले गीत रेकर्ड गराएका छन्। त्यसयता भने उनको पारिश्रमिक बढेर अहिले ५ लाख पुगेको बताइन्छ। त्यसमाथि विष्णुलाई गाउन दिन उनका श्रीमान सुन्दरमणि अधिकारीसँग कुरा गर्नुपर्ने हुन्छ। तर उनीसँग पनि सहज तरिकाले कुरा हुन नसक्दा र भएपछि महंगो पारिश्रमिक भन्दा पछिल्लो समय सहकार्य नजुरेको यसअघि सहकार्य गरेका गायकहरू बताउँछन्।
'वसन्त' को कुरा गर्दा फिल्ममा प्रकाश र स्वस्तिमा खड्का शीर्ष भूमिकामा छन्।
फिल्म चैते दसैंको अवसर पारेर चैत २२ गतेदेखि प्रदर्शनमा आउनेछ।
-1742801159.jpg)
