बलिउड अभिनेता सलमान खानलाई ज्यान मार्ने धम्की दिने व्यक्तिलाई पक्राउ गरिएको छ।
आइतबार मुम्बईको वर्ली इलाकास्थित ट्रान्सपोर्ट डिपार्टमेन्टमा एक म्यासेजमार्फत सलमानलाई ज्यान मार्ने धम्की आएको थियो। 'सलमान खानको घरमा छिरेर मार्छौं र उनको कार बमले उडाइदिन्छौं,' म्यासेजमा लेखिएको थियो।
भारतीय सञ्चारमाध्यम दैनिक भास्करका अनुसार सलमानलाई धम्की दिने व्यक्तिलाई वडोदरा नजिकैको एउटा गाउँबाट पक्राउ गरिएको हो। उक्त म्यासेज पठाउने व्यक्ति २६ वर्षका छन्। तर उनको नाम सार्वजनिक गरिएको छैन।
उनको परिवारका अनुसार म्यासेज पठाउने व्यक्तिको मानसिक स्थिति ठीक थिएन। यस विषयमा पुलिस जाँच गरिरहेको छ।
गतवर्ष १४ अप्रिलमा सलमान खानको ग्यालेक्सी अपार्टमेन्टमा गोली प्रहार गरिएको थियो। यस हमला लोरेन्स ग्याङले गरेको थियो। त्यसपछि पुलिसले ७ जना व्यक्तिलाई पक्राउ गरेको थियो। जसमध्ये एक जना आरोपीले जेलमै आत्महत्या गरेका थिए।
