उज्यालो नेपाल पार्टीका अध्यक्ष कुलमान घिसिङले काठमाडौं–३ को मतगणनामा सुरूआती अग्रता लिएका छन्।
पहिलो मत परिणाम अनुसार यहाँ घिसिङले १०४१ मत लिएर अग्रता लिएका हुन्। उनका निकट प्रतिद्वन्द्वी राष्ट्रिय स्वतन्त्र पार्टी (रास्वपा) का राजुनाथ पाण्डेले ७४८ मत प्राप्त गरेको निर्वाचन अधिकृत चमिला भट्टराईले जानकारी दिइन्।
यो निर्वाचन क्षेत्रमा गोकर्णेश्वर नगरपालिकाको वडा नम्बर १ बाट मत गन्न सुरू गरिएको थियो।
यहाँ नेपाली कांग्रेसका रमेश अर्याल २९८ मत ल्याएर तेस्रो स्थानमा छन् भने नेकपा एमालेका रामेश्वर फुयाल २७८ मत ल्याएर चौथो स्थानमा छन्।
नेपाली कम्युनिस्ट पार्टी (नेकपा) का निरज लामाले अहिलेसम्म ३५ मत ल्याएका छन्।
यो निर्वाचन क्षेत्रको मतगणना नारायणटारस्थित चामुण्डा माध्यमिक विद्यालयमा भइरहेको छ।
६४ हजार ४७९ मतदाता रहेको यो उत्तरपूर्वी काठमाडौं भूगोलका हिसाबले सानो निर्वाचन क्षेत्र हो, जहाँ १३ वटा वडा मात्र छन्।
कागेश्वरी मनोहरा नगरपालिकाकाको वडा नम्बर १ (गागलफेदी), २ (आलापोट), ३ (भद्रबास र डाँछीका केही भाग); गोकर्णेश्वर नगरपालिकाको वडा १ (सुन्दरीजल), २ (नयाँपाटी), ३ (बालुवा), ४ (गोकर्ण), ५ (जोरपाटी चोक), ६ (नयाँ बस्ती), ७ (दक्षिणढोका), ८ (आत्तरखेल), ९ (आरूबारी) र काठमाडौं महानगरपालिकाका ६ नम्बर वडा यो निर्वाचन क्षेत्रमा समेटिएका छन्।
यस निर्वाचन क्षेत्रभित्र ठूलो मताधार जोरपाटी र बौद्ध क्षेत्रमै छ। त्यसमध्ये काठमाडौं–६, गोकर्णेश्वर–६, ५ र ८ नम्बर वडामा बढी मतदाता छन्।
