दक्षिण भारतीय फिल्म निर्देशक एटली कुमारले आफ्नो आगामी फिल्मबाट अभिनेता सलमान खानलाई रिप्लेस गरेका छन्।
उनले सलमान खानको ठाउँमा अल्लू अर्जुनलाई कास्ट गरेका छन्। भारतीय सञ्चारमाध्यम पिपिङ मूनका अनुसार एटलीले सलमान खानका पछिल्ला फिल्मले बक्स अफिसमा खराब प्रस्तुति गरेपछि यो निर्णय लिएका हुन्।
एटली सलमान खान र रजनीकान्तसँग यस फिल्म बनाउन चाहन्थे। तर उनले सलमानको ठाउँमा अल्लू अर्जुनलाई लिएका छन्। अर्काे अभिनेताको खोजी भइरहेको छ।
६०० करोड भारूको बजेटमा बन्ने फिल्मलाई सन पिक्चर्सले निर्माण गर्नेछ। एक्सनले भरपूर यो फिल्म पुनर्जन्ममा आधारित हुनेछ। जसमा तीन अभिनेत्री देखिनेछन्। भारतीय सञ्चारमाध्यमका अनुसार फिल्ममा जान्हवी कपूर पनि काम गर्न सक्छिन्। तर अहिलेसम्म आधिकारिक रूपमा घोषणा गरिएको छैन।
यो फिल्मको छायांकन यस वर्षको अन्त्यमा सुरू हुनेछ। अहिले यस फिल्मको प्रि-प्रोडक्सनको काम चलिरहेको छ।
