बलिउड अभिनेता अमन वर्मा र उनकी श्रीमती वंदना लालवानी सम्बन्ध विच्छेद गर्दैछन्।
भारतीय सञ्चारमाध्यम दैनिक जागरणका अनुसार केही समयदेखि अमन र वंदनाबीच राम्रो सम्बन्ध छैन। उनीहरू दुईले धेरै पटक समस्याको समाधान गर्ने कोशिश गरेका थिए, तर उनीहरूको सम्बन्धमा सुधार आएन।
सम्बन्धमा सुधार नआएपछि वंधनाले भारतको अदालतमा सम्बन्ध विच्छेदको उजुरी दिएकी छन्। यस विषयमा अमनले भारतीय सञ्चारमाध्यम हिन्दुस्तान टाइम्ससँग कुराकानी गरेका छन्।
'अहिले केही बोल्न चाहन्न। मैले जे बोल्नु पर्ने हो त्यो मेरो वकिलको माध्यमबाट बताइनेछ। यस विषयमा कुराकानी गर्ने अहिले सही समय होइन,' उनले भनेका छन्।
यस विषयमा वंदनाले केही बताएकी छैनन्। अमन र वंदनाले सन् २०१६ मा विवाह गरेका थिए।
अमनले 'अन्दाज, बागबान, तीस मार खान' जस्ता फिल्ममा काम गरेका छन्। उनले 'सास भी कभी बहू थी, खुलजा सिम सिम, कुमकुम, ना इस देश में लाडो' जस्ता टेलिशृंखलामा काम गरेका छन्।
वंदनाले 'बम्बे, याद रखेगी दुनियाँ' जस्तो फिल्ममा काम गरेकी छन्। उनले 'बुद्धः राजाओंका राजा' र 'बाबुलकी बिटिया चली डोली सजा' जस्ता टेलिशृंखलामा काम गरेकी छन्।
