भारतीय कमेडियन समय रैनाले युट्युब च्यानलबाट आफ्नो पडकास्ट शो 'इन्डियाज गट लेटेन्ट' को सबै भिडिओ हटाएका छन्।
पडकास्कटमा रणवीर इलाहाबादियाले विवादित अभिव्यक्ति राखेपछि मुम्बई प्रहरी जाँच गरिरहेको छ। प्रहरीले समय रैना र रणवीर इलाहाबादियालाई सोधपुछका लागि सम्पर्क गरेको छ।
विवाद बढेपछि समय रैनाले एक्समा एक पोस्ट गरेका छन्। 'जे भइरहेको छ, यो सबैलाई सम्हाल्न मलाई कठिन भएको छ। मैले आफ्नो युट्युब च्यानलबाट इन्डियाज गट लेटेन्टका सबै भिडिओ हटाएको छु। मेरो उद्देश्य मानिसलाई हँसाउने र राम्रो समय बिताउनु थियो। निष्पक्ष रूपमा छानबिनका लागि म सबै निकायसँग सहकार्य गर्न तयार छु,' उनले लेखेका छन्।
यो घटनामा रणवीर अल्लाहबादियाले पनि माफी मागेका छन्। होस्ट मात्र नभएर त्यहाँ पुगेका ३० गेस्टविरुद्ध पनि महाराष्ट्र, पश्चिम बंगालसहितका भारतीय राज्यमा मुद्दा दायर भएको छ।
प्रहरी, महिला आयोग, मानवअधिकार आयोगले पनि मुद्दा दायर गर्दै उपस्थितिको लागि पत्र काटेका छन्। संसदमा समेत चर्चा भएको छ भने गृहमन्त्री अमित शाहलाई पत्र लेखिएको छ। महाराष्ट्रका मुख्यमन्त्री देवेन्द्र फडणवीसले समेत यसको विरोध गरेका छन्।
