यो वर्षको सुरूआतमा भारतीय अभिनेता श्रेयस तलपडेका बारेमा नराम्रो खबर आएको थियो। उनी फिल्म 'वेलकम टू जंगल' को सेटमा अचानक लडेका थिए।
उनलाई हृदयाघात भएको थियो। यसपछि केही महिना उनले कामबाट बिदा लिएर आराम गरेका थिए। यसबीच उनका दुइटा फिल्म रिलिज भए; कर्तम भुगतम र चन्दु च्याम्पियन। दुवै फिल्ममा उनको भूमिकाको प्रशंसा भएको छ।
हालै उनको नयाँ फिल्म 'इमर्जेन्सी' को ट्रेलर पनि रिलिज भएको छ। कंगना रनावतको निर्देशनमा बनेको यो फिल्ममा श्रेयसको लुक्सलाई लिएर प्रशंसकहरू उत्साहित भएका छन्।
तर यसैबीच उनको मृत्युको खबरले सामाजिक सञ्जालमा चर्चा पायो।
आफ्नो मृत्यु भएको खबरले सनसनी मच्चाएपछि श्रेयसले आफै सामाजिक सञ्जालमा लेख्दै यसको खन्डन गरेका छन्।
'म सबैलाई विश्वास दिलाउँछु कि म जिउँदै छु, खुसी छु र स्वस्थ छु। सामाजिक सञ्जालमा मेरो मृत्यु भएको खबर देखेँ। मलाई थाहा छ कि मजाकको आफ्नो ठाउँ हुन्छ। तर जब यसको गलत प्रयोग हुन्छ तब यसले वास्तवमै हानि पुर्याउँछ। कसैले मजाकका रूपमा सुरू गरेको होला तर अब यसले समस्या हुन थालेको छ। खासगरी परिवारमा चिन्ता बढेको छ।'
'गोलमाल' अभिनेता श्रेयसले यो कुराले आफ्नो छोरीलाई डर लाग्न थालेको बताएका छन्।
'स्कुल जाने उमेरकी मेरी सानी छोरी प्रायः मेरो स्वास्थ्यबारे सोधिरहन्छिन्। मेरो मृत्युको अफवाहले उनको डर बढाएको छ। उनी आफ्ना शिक्षक र साथीहरूसँग पनि मेरी स्वास्थ्यबारे सोधिरहन्छिन्। जो मेरो मृत्युको खबर फैलाइरहेका छन्, म उनीहरूलाई यसो नगर्न अपील गर्छु र यसको प्रभाव बुझून् भन्ने चाहन्छु।'
