फरहान अख्तरको निर्देशनमा बन्ने फिल्म 'डन ३' घोषणा गरेसँगै चर्चामा छ।
यस फिल्मबाट शाहरूख खान बाहिरिएपछि अभिनेता रणवीर सिंहलाई अनुबन्ध गराइएको थियो। शाहरूखको स्थानमा रणवीर अनुबन्धित भएको खबर बाहिरिएसँगै शाहरूखका फ्यान निराश भएका छन्। रणवीरले शाहरूखको जस्तो अभिनय गर्न नसक्ने उनीहरूको तर्क छ। यसैबीच फिल्ममा कियारा अडवानी अनुबन्धित भएकी छन्।
सोमबार निर्माण टिमले एक भिडिओ सार्वजनिक गर्दै फिल्ममा कियारा अनुबन्धित भएको जानकारी दिएका हुन्। भिडिओमा कियारा अडवानीलाई डन युनिर्भसमा स्वागत छ भनेर लेखिएको छ।
रणवीर र कियारा पहिलो पटक एकसाथ फिल्ममा देखिन लागेका हुन्। फिल्ममा अनुबन्धित भएपछि कियाराले सामाजिक सञ्जालमार्फत खुशी व्यक्त गरेकी छन्।
फरहान अख्तरले अमिताभ बच्चन, शाहरुख खान र एक नयाँ अभिनेतालाई लिएर फिल्म बनाउने योजना बनाएका थिए। तर अख्तरको तीन पुस्ता लिएर फिल्म बनाउने योजना शाहरूखलाई मन नपरेको बताइएको छ।
'डन र डन २' मा अभिनेता शाहरूख खानले अभिनय गरेका थिए। उनको केही संवाद निकै चर्चित भएको थियो।
