बलिउड अभिनेता ऋतिक रोशनको फिल्म 'फाइटर' को अग्रिम टिकट बुकिङ खुला गरिएको छ।
अग्रिम टिकट बुकिङ खुला गरेसँगै फिल्मले राम्रो कमाइ गरिरहेको छ। फिल्मले अग्रिम टिकट बुकिङमा ३ करोड ६ लाख भारू कमाएको छ।
भारतीय सञ्चारमाध्यम दैनिक जागरणका अनुसार फिल्मको ९३ हजार ७ सय टिकट बिक्री भइसकेको छ। २५० करोड भारूमा बनेको फिल्म प्रदर्शन हुन अझै ३ दिन बाँकी छ। यो फिल्मले सात हजार शो पाएको छ।
सिद्धार्थ आनन्द निर्देशित फिल्ममा ऋतिक रोशनसँगै दीपिका पादुकोण र अनिल कपूरको मुख्य भूमिका छ। उनीहरू स्क्वाड्रन लिडरको भूमिकामा देखिएका छन्। फिल्ममा ऋतिक 'पैटी', दीपिका 'मिन्नी' र अनिल कपूर 'रकी' पात्रको भूमिकामा देखिनेछन्।
यो फिल्म देशभक्ति भावनामा आधारित छ। फिल्म भारतको ७५ औं गणतन्त्र दिवसको अवसरमा २५ जनावरीमा रिलिज हुँदैछ।
