बलिउड अभिनेत्री कट्रीना कैफ र विजय सेतुपति अभिनीत फिल्म 'मेरी क्रिसमस' प्रदर्शन भइरहेको छ।
१२ जनावरीदेखि प्रदर्शन भइरहेको 'मेरी क्रिसमस' लाई हिन्दी फिल्म समीक्षकले सकारात्मक प्रतिक्रिया दिइरहेका छन्। उनीहरूले सस्पेन्स थ्रिलर फिल्मलाई रूचाइरहेका छन्। तर दर्शकले यस फिल्मप्रति चासो देखाएका छैनन्। भारतीय बक्स अफिसमा फिल्मको कमाइ दिनप्रति दिन घट्दोक्रममा छ।
भारतीय सञ्चारमाध्यम द इन्डिया एक्सप्रेसका अनुसार फिल्मले पाँच दिनमा १२ करोड ५३ लाख भारू कमाएको छ। २ करोड ५५ लाखमा ओपनिङ गरेको फिल्मले दोस्रो दिन ३ करोड ५० लाख, तेस्रो दिन ३ करोड ८५ लाख, चौथो दिन १ करोड ६५ लाख र पाँचौं दिन १ करोड १५ लाख भारू कमाएको हो।
यो फिल्मको बजेट ६० करोड भारू बताएको छ। ठूलो बजेटको फिल्मले खासै राम्रो कमाउन नसकेको भारतीय फिल्मकर्मीले बताएका छन्।
श्रीराम राघवन निर्देशित फिल्म 'मेरी क्रिसमस' मा कट्रीना कैफ, विजय सेतुपति र राधिका अप्टेको मुख्य भूमिका छ। फिल्म उनीहरूले पहिलोपटक एकसाथ काम गरेका हुन्।
