मंसिर १२ गतेदेखि प्रदर्शनमा आउने पारिवारिक कथानक फिल्म 'हर्ष' ले आफ्नो नयाँ गीत 'सिठ्ठी मार' सार्वजनिक गरेको छ।
शुक्रबार सार्वजनिक गरिएको यस गीतमा प्रताप दास र सदीक्षा कट्टेलको स्वर छ। एलिस कार्कीको संगीत रहेको गीतमा पवित्रा घिमिरेको शब्द रचना छ। डेब्यु निर्देशक एकता पौडेल निर्देशित फिल्मका प्रायः कलाकारहरू फिचर्ड यस भिडिओ आलोक शुक्लाले खिचेका हुन् भने कोरियोग्राफी सुनिल क्षेत्रीको हो।
पारिवारिक जमघटको माहोलमा तयार पारिएको यो गीतमा वर्षा राउत, खगेन्द्र लामिछाने, सन्तोष पन्त, विशाल पहारी, शर्मिला मल्ल, अंशु महर्जन, सुनिल क्षेत्री, माओत्से गुरुङ, लुनिभा तुलाधरलगायतका कलाकारहरू देख्न सकिन्छ। सार्वजनिक गीत नेपाली दर्शक-श्रोतालाई विभिन्न रमाइलो जमघटका लागि नृत्यप्रधान हुन सक्छ।
'हर्ष' फिल्म प्रशन्न पौडेल तथा विकास पौडेलले निर्माण गरेका हुन् भने कार्यकारी निर्मातामा हिक्मत चोखाल छन्।
अष्टलक्ष्मी प्रोडक्सन्स् र ई–प्राइम मुभिजको ब्यानरमा निर्माण भएको फिल्मको कथा निर्देशक पौडेल स्वयंले लेखेकी हुन्।
दिवंगत निर्देशक शिव रेग्मीकी भान्जी पौडेलले न्यूयोर्क सिनेमा एकेडेमीमा सिनेमा मेकिङ अध्ययन तथा आमसञ्चारमा स्नातक गरेकी छन्। व्यवस्थापन तथा नेतृत्व विषयमा स्नातकोत्तर गरेकी निर्देशक पौडेलले यसअघि केही छोटा सिनेमाहरू समेत निर्माण गरेकी छन्।
-1746009348.jpg)
