'गाँवै रमाइलो' नामक नयाँ हास्य शृंखला बिहीबारदेखि दर्शकमाझ आउने भएको छ।
कलाकार, टेलिफिल्म निर्माता तथा परिकल्पनाकार जयकुमार थापा र निर्माता नदिश मानन्धरले गणतन्त्र दिवसको अवसर पारेर यो हास्य शृंखलाको प्रसारण आरम्भ गर्न लागेका हुन्।
यो शृंखला देवकी मिडिया नामक युट्युब च्यानलबाट हरेक साताको बिहीबार बेलुका ७ः३० बजे प्रसारण हुने छ।
सामाजिक तथा राजनीतिक विषयवस्तुमाथि तीखो व्यङ्ग्य गर्ने कथावस्तु लिएर आफूहरूले नयाँ हास्य शृंखला ल्याउन लागेको निर्माता थापा तथा मानन्धरले बताए।
उनीहरूका अनुसार यो हास्य शृंङ्खलाको उद्देश्य विभिन्न कारण तथा सामाजिक समस्याका कारण गाउँबाट टाढिएका युवा–पीढी तथा अन्य त्यस्तै व्यक्तिहरूलाई गाउँ फर्किन प्रेरित गर्ने रहेको छ।
'नेपाली समाजका नयाँ युवापिढी विदेशिएका छन्, काम विशेषले कति मानिस आफ्नो क्षेत्र छोडेर लाखापाखा भएका छन्,' परिकल्पनाकार थापाले भने, 'हामी हास्य–व्यंग्यमार्फत् मनोरञ्जन दिने उद्देश्यले आफ्नो गाउँबाट टाढिएका युवा–पिढीसहितलाई गाउँ फर्किनुपर्छ, जता भए पनि गाउँ नै रमाइलो छ भन्ने सन्देश दिन चाहन्छौं।'
'गाँवै रमाइलो' शृंखलाले समाजबाट पछि परेका व्यक्तिहरूको प्रतिनिधिमूलक कथा भन्ने थापाले बताए।
उनले भने, 'समाजमा राजनीतिक, आर्थिक सबै पक्षबाट पिछडिएका व्यक्तिहरूको आवाज बनेर गाँवै रमाइलो प्रस्तुत हुने छ।'
'गाँवै रमाइलो' का निर्माता जयकुमार थापा र नदिश मानन्धर हुन् भने परिकल्पनाकार जयकुमार थापा हुन्। यसका लेखक तथा निर्देशक नेत्र राउत हुन्। हास्य शृंखलामा नेपालमा चलेका हास्य कलाकारहरूको बाहुल्य उपस्थिति छ। कलाकारको रूपमा निर्माता तथा परिकल्पनाकार थापा आफू पनि अभिनयमा देखिनेछन्।
यसैगरी, कलाकार देशभक्त खनाल, दमन रूपाखेती, लक्ष्मणविक्रम बस्नेत, सुरेश थापा, विनोद राई, नवीना सिलवाल, नेत्रविक्रम खड्का, सुभाना राई र कृशला तामाङको अभिनय रहनेछ। शृंखलामा स्वर, शब्द तथा संगीत नवीन रावलको छ।
यस्तै, मिक्सिङ किस्मत स्टुडिओले गरेको छ। पाश्र्व ध्वनी सुवचन सेन्चुरीले दिएका छन्। यसमा ज्ञानकुमार कट्टेलको छायांकन तथा राजकुमार कार्कीको सम्पादन रहनेछ।
निर्माता जयकुमार थापा एभरेष्ट बैंकबाट अवकाशप्राप्त कर्मचारी हुन्। उनले बैंकमा कार्यरत रहँदै 'लोडसेडिङ', 'गुलेली', 'उटपट्याङ' जस्ता टेलिसिरियल ल्याएका थिए।
यस्तै, जयकुमार थापा र सुजित थापाको नेतृत्वमा अर्को टेलिशृंखला 'तारा' बजारमा ल्याउने तयारीमा छ।
