गायिका तथा संगीतकार झुमा लिम्बूले फिल्म 'जार' मा आफूले खुलेर काम गर्न पाएको बताएकी छन्।
संगीतमा वर्षौ वर्ष बिताउँदा अहिले आएर भनेजस्तो काम गर्न पाएको उनले बताएकी हुन्।
पत्रकारहरूसँगको अन्तरक्रियामा उनले भनिन् 'म्युजिक गर्दै जाँदा, काम गर्दै जाँदा ठीक मैले भनेको जस्तो काम गर्न पाएको फिल्म हो जार। मैले गरिरहेको खालको म्युजिक गर्नुपर्यो भन्दै फिल्मको टिमबाट आउनुभएपछि मैले नाइँ भन्ने कुरै आएन। त्यसैले जारमा काम गरेँ।'
आफ्नो सांगीतिक करियरको २५ वर्षमा आएपछि भनेजस्तो काम गर्न पाएको उनको भनाइ छ। भनिन्- 'पूरै त चित्त बुझ्दो रहेनछ। अलिअलि चाहिँ चित्त बुझेको छ। जारमा अलिअलि चाहिँ काम गर्ने ठाउँ पाएँ भन्ने लाग्छ।'
फिल्म 'जार' का पात्रहरू लिम्बू गाउँमा पुगेपछि आफूले लिम्बू समुदायको संगीतमा काम गर्न पाएको उनको भनाइ छ।
गत मंगलबार आयोजित प्रिमियरमा फिल्म फिल्म हेर्ने अधिकांशले यसको गीत र संगीतको खुलेर तारिफ गरेका छन्।
लिम्बू समुदाय रहेको पूर्वी पहाडी जिल्ला र लिम्बू समुदायको संस्कृति र संस्कार, लय र तालमा झुमाले यसको गीत र संगीत तयार पारेकी छन्। जसको फिल्म हेर्ने दर्शकले खुलेर प्रशंसा गरेका हुन्।
'जार' मा गीतसँगै पात्रको यात्रामा गीत छन्, जसलाई तयार पार्ने र गाउने काम झुमाले गरेकी छन्।
सन १८०० को दशकको वास्तविक घटनामा आधारित फिल्म जार शुक्रबारदेखि प्रदर्शनमा आउँदैछ। 'जार' साहित्यकार इन्द्रबहादुर राईको ऐतिहासिक कथामा आधारित फिल्म हो। २२५ वर्ष अगाडिको कथामा आधारित रहेर बनेको फिल्मलाई फुर्वा छिरिङ लामाले निर्देशन गरेका छन्।
फिल्ममा सौगात मल्ल, अनुपविक्रम शाही, अभिनेत्री गीताञ्जली थापालगायत कलाकारको मुख्य भूमिका छ।
फेरि टेल पिक्चर्सले होप रिल्स, एलए सेभेन सर्टस, बराल स्टुडियो र किवा प्रोडक्सनको सहकार्यमा फिल्म निर्माण गरेको हो। यसको कार्यकारी निर्मातामा त्रिलोचन पाण्डे, नीरज राई, नुर्साङ भुटिया, ज्योती क्षेत्री र पेमा रिन्जिङ लेप्चा छन्।
सरवानन इलावार्सुको छायांकन रहेको फिल्ममा अखिलेश राईको सम्पादन छ। सिनेमामा झुमा लिम्बू र गंगा थापाको संगीत छ।
'‘जार' नेपाल र भारतसहित अन्तर्राष्ट्रिय बजारमा एकसाथ प्रदर्शनमा आउन लागेको हो।
नेपालमा सिनेमा हलहरूले फिल्मको बुकिङ खुलाइसकेका छन्।
