दर्शकमाझ चर्चित टेलिसिरियल 'जुठे' बाट यसका लेखक, निर्देशक तथा कलाकार राजु पौडेल (राजु मास्टर) बाहिरिएका छन्। यो सिरियल उनी र मरिचमान श्रेष्ठ (बल्छि ध्रुर्बे) मिलेर दर्शकमाझ ल्याउँदै आएका थिए।
सिरियलको लेखन, निर्देशनका साथै शीर्ष कलाकारका रूपमा उनीहरू देखिँदै आएका थिए।
अब भने राजु मास्टर सिरियलबाट बाहिरएका छन्।
सिरियलमा गोथे पात्रको भूमिकामा देखिँदै आएका उनले सामाजिक सञ्जालमा एक पोस्ट राख्दै आफू 'जुठे’ बाट बाहिरिएको जानकारी दिएका हुन्।
उनले लेखेका छन्,- 'जुठे सिरियलको एक पात्र अझै भनौं, साना–साना भाइबहिनीहरूको र बुढाबुढी भएका बा आमाहरूको अनुहारमा हाँसो छर्ने एक पात्र (गोथे)। गोथेको यात्रा जुठेमा भने अब टुंगिएको छ। आजसम्मको यात्रामा साथ दिने सम्पूर्ण कलाकारज्यूहरू र भगवान रुपी दर्शकहरुलाई मुरीमुरी धन्यवाद दिन चाहेँ। जुठेमा गोथे खोज्ने सबै मेरा सानासाना भाइबहिनीहरू र गोथे मन पराउने सम्पूर्ण दर्शकहरुसँग क्षमा माग्न चाहेँ। किनकि अब जुठेमा गोथे हुने छैन। आगामी नयाँ भागहरूको लागि जुठे परिवारलाई शुभकामना।'
यसअघि राजु मास्टर र बल्छिले अर्को सिरियल 'हल्का रमाइलो' मा पनि सहकार्य गर्दै आएका थिए। यो सिरियलबाट राजु मास्टर पहिल्यै बाहिरिइसकेका छन् भने अहिले यसलाई बल्छीधुर्बेले निरन्तरता दिइरहेका छन्।
राजुले डेढ वर्षअघिदेखि 'सकस' सिरियल ल्याउँदै आएका छन्, जसलाई दर्शकहरूले रूचाइरहेका छन्।
अब 'सकस' सिरियलमा मात्रै फोकस हुने योजनासहित आफूले 'जुठे' छाडेको उनी बताउँछन्।
उनले भने, 'एउटा सिरियलमा मात्रै केन्द्रित भएर त्यसलाई राम्रो बनाऔं भनेर जुठे छाडेको हुँ। अब सकसमा केन्द्रित हुनेछु।'
उनले आपसी सल्लाहमै आफू 'जुठे' बाट बाहिरिएको बताए। 'दुईजनाले कथामा काम गर्दा स्क्रिप्ट बाँझिएको पनि थियो। कथा एउटै भयो परिवर्तन गर्नुपर्यो भन्ने माग समेत दर्शकहरूबाट आइरहेको थियो। त्यसैले जसले गरे पनि एकजनाले गरौं भन्ने सल्लाह भएर मैले छाडेको हुँ,' राजुले भने।
'जुठे' बाट राजु बाहिरिए पनि यसलाई बल्छीधुर्वेले नै निरन्तरता दिनेछन्।
-1746513231.jpg)
