गायक तथा अभिनेता प्रकाश सपुतको निर्देशनमा बनेको फिल्म 'वसन्त' को पहिलो गीत सार्वजनिक गरिएको छ।
शनिबार काठमाडौंमा एक कार्यक्रमकाबीच सार्वजनिक गीत 'साँझ पर्यो झमक्क' मा प्रकाश स्वयं र शान्तिश्री परियारको स्वर छ।
गीतको शब्द र संगीत पनि प्रकाश स्वयंमको हो भने एरेन्जको काम सुदीप सागरले गरेका हुन्।
भिडिओमा फिल्मका मुख्य कलाकार प्रकाश र स्वस्तिमा खड्का फिचर्ड छन्। साथमा अन्य कलाकारहरू प्रभात पाल ठकुरी, खड्गबहादुर पुन, शिभान्सी श्रीलाई पनि देखाइएको छ।
फिल्मका मुख्य पात्र वसन्त र शान्तीको प्रेमलाई भिडिओमा देखाइएको छ।
भिडिओलाई मौसम हिमालीले कोरियोग्राफी गरेका हुन्।
गलबन्दी प्रोडक्सनबाट बनेको वसन्तको कथा र संगीत पनि प्रकाशकै हो। फिल्मको निर्मातामा मोहन विश्वकर्मा र बिन्दु बोहोरा छन्। कार्यकारी निर्मातामा बिरेन्द्र नारायण श्रेष्ठ, अनुरोध भट्टराई र नाना थकाली छन्।
मुख्य सह–निर्देशन सुनिल विकको छ। प्रोजेक्ट हेड दिल शिरीष हुन्।
फिल्म चैत २२ गते (चैते दसैं) मा रिलिज हुनेछ।
