नेपाली फिल्म 'फिरफिरे फिरिरि' को फर्स्टलुक पोस्टर सार्वजनिक गरिएको छ।
विन्ध्यवासिनी क्रियसनद्वारा निर्मित फिल्मलाई मनोज कुमार अधिकारीले प्रस्तुत गरेका हुन्। नवीन भट्टको निर्देशन रहेको यो फिल्म हरर कमेडी जनरामा बनेको हो।
सार्वजनिक पोस्टरमा चारजना पात्रहरूलाई देखाइएको छ। स्कुटीमा बसिरहेकी युवतीलाई तिन जना युवाहरूले तानातान गर्दै गरेको पोस्टरमा देख्न सकिन्छ। 'फिरफिरे फिरिरि' फिल्मको नाम पहेलो रंगले हाइलाइट गरिएको छ जसमा स्लोगन 'आज साइकल...भोली फरारी...' लेखिएको छ।
फर्स्टलुकसंगै फिल्मको प्रदर्शन मिति समेत घोषणा गरिएको छ। फिल्म आगामी कार्तिक २२ गते छठ पर्वको दिनबाट प्रदर्शनमा आउनेछ।
यो फिल्मबाट सन्दीप श्रेष्ठ र भावना उप्रेतीले नेपाली रजतपटमा डेब्यु गर्दैछन्। साथमा मनोज कुमार अधिकारी, शंकर सेढाई, पिटर प्रिन्स, रबिना केसी, पुष्प अवस्थी, सूर्यमान लिम्बु लगायतका कलाकारहरूको अभिनय छ।
यसका निर्माता अधिकारी करिब १५ वर्षपछि फेरि फिल्म निर्माणमा फर्किएका हुन्। उनले 'नौ डाँडा पारी, मंगलसुत्र' फिल्म निर्माण गरेका थिए। अब निरन्तर फिल्म निर्माणमा लाग्ने योजनासहित 'फिरफिरे फिरिरि' बनाएको उनी बताउँछन्।
सन्दिप श्रेष्ठ र नवीन भट्टको लेखन रहेको यो फिल्मले दर्शकलाई पूर्ण मनोरञ्जन प्रदान गर्नेमा निर्माण टिम ढुक्क देखिएको छ।
फिल्ममा जितु तामाङको छायांकन, अनन्त घिमिरेको सम्पादन तथा कलर संयोजन छ। फिल्मलाई देशभर आरआर फिल्म्सले वितरण गर्नेछ।
