युट्युब ट्रेन्डिङको शीर्षस्थानमा फिल्मका गीत देखिएका छन्। ट्रेन्डिङमा संगीत खण्डतर्फ पहिलो नम्बरमा 'खुस्मा' र दोस्रो नम्बरमा '१२ गाउँ' को गीत छ।
'खुस्मा' को 'रूकुम मैकोट' गीतलाई बुधबार दिउँसोसम्म ५१ लाखभन्दा बढी पटक हेरिएको छ। यसको भिडिओमा फिल्मका शीर्ष कलाकार धिरज मगर र उपासना सिंह ठकुरी फिचर्ड छन्।
गीतमा स्वर एसडी योगी र शान्तिश्री परियारको छ। सुरेन्द्र रानाको शब्द, एसडी योगीको संगीत निर्देशन छ। गीत दुई साताअघि सार्वजनिक भएको हो।
'खुस्मा' लाई अशोक थापा मगरले निर्देशन गरेका हुन्। फिल्म असोज ३ गते रिलिज हुँदैछ।
त्यस्तै '१२ गाउँ' को 'सिनेमा हेर्न जाउँ' बोलको गीतलाई रिलिजको चार दिनमा ८ लाख ६५ हजारभन्दा बढी पटक हेरिएको छ। यसको भिडिओमा फिल्मका शीर्ष कलाकार समीर भट्ट र सोनु चन्द्रपालको नृत्य छ। स्वर बलिउड गायक नकाश अजिजको छ। अर्जुन पोखरेलको संगीत रहेको गीतका शब्द पोखरेल र विराज भट्ट मिलेर लेखेका हुन्।
सुनिल क्षेत्री भिडिओका कोरियोग्राफर हुन्।
फिल्म '१२ गाउँ' लाई विराज भट्टले निर्देशन गरेका हुन्। असोज २४ अर्थात दसैंको फूलपातिमा फिल्म रिलिज हुनेछ।
