अभिनेता धिरज मगर र अभिनेत्री उपासना सिंह ठकुरी अभिनीत फिल्म 'खुस्मा' को ट्रेलर सार्वजनिक गरिएको छ।
मंगलबार धिरजको जन्मदिन पारेर काठमाडौंमा आयोजित कार्यक्रमकाबीच ट्रेलर रिलिज गरिएको हो।
सार्वजनिक ट्रेलरले फिल्मको कथावस्तुबारे प्रकाश पारेको छ। शीर्ष कलाकार धिरज र उपासनाको प्रेम, विवाह र बिछोडको कथालाई ट्रेलरमा देखाइएको छ।
लेखक एवं निर्देशक अशोक थापा मगरका अनुसार द्वन्द्वकालको समयको प्रेमकथामा यो फिल्म बनेको हो। यद्यपि द्वन्द्वको कथा भने नभएको उनले बताएका छन्।
आयोजित कार्यक्रममा निर्माण टिमले केक काटेर धिरजको जन्मदिन सेलिब्रेसन समेत गरेको थियो।
यो फिल्ममा धिरज र उपासनाका साथमा माओत्से गुरूङ, राज थापा काउछा, विजय संयोक सुब्बा, सुजाता राई, अस्तित्व भट्टचन, खडक बहादुर पुन लगायतका कलाकारहरूको अभिनय छ।
एम मिडिया प्रालिको ब्यानरमा निर्माण भएको फिल्मको निर्मातामा वीर बहादुर लामा, चन्द्र भट्टचन, मान बहादुर धनाह मगर र बेतान मगर छन्, भने सह–निर्माता सुस्मिता बुढाथोकी हुन्।
फिल्मको सार्वजनिक दुई गीत र टिजरलाई दर्शकले रूचाएका छन्।
फिल्म असोज ३ गते रिलिज हुँदैछ।
