मिलन चाम्सको निर्देशनमा बनेको फिल्म ‘वर एण्ड वधु’ को रोमान्टिक गीत सार्वजनिक गरिएको छ।
आइतबार काठमाडौंमा आयोजित कार्यक्रमकाबीच सार्वजनिक 'तिमी सँग' बोलको गीतमा अन्जु पन्त र प्रताप दासको स्वर छ। भिडिओमा अभिनेत्री आँचल शर्मा र नव–अभिनेता विवेक कर्माचार्य फिचर्ड छन्। गीतमा एकअर्कासँग जिउने वाचा गरिरहेका उनीहरू रोमान्टिक देखिएका छन्।
अर्जुन पोखरेलको संगीत रहेको यो गीतका शब्द लेखु सहयात्रीका हुन्।
‘वर एण्ड वधु’ मा आँचल र विवेकका साथमा विजय लामा, गरिमा शर्मा, विजु पार्की, किरण के.सी, सरिता लामिछाने, कुसुम शर्मा, सृष्टि खड्का, हिमेश पन्त, दिनेश काफ्ले, यमन श्रेष्ठ, रवीन्द्र खड्का, अंशु महर्जन र सीता न्यौपानेको अभिनय छ।
प्रदीप भारद्वाजको लेखन रहेको फिल्मको निर्माता जानुका थापा हुन्। कार्यकारी निर्माताका रूपमा अमित रिजाल छन्। नेपाल र रोमानियामा खिचिएको फिल्मले सामाजिक विषयलाई रमाइलो शैलीमा भन्ने निर्माणपक्षले बताएको छ।
फिल्म भदौ १४ गते रिलिज तयारीमा छ।
