दयाहाङ राई र मिरूना मगर अभिनीत फिल्म 'घरज्वाइँ' ले दुई दिनमा डेढ करोड रूपैयाँ ग्रस कलेक्सन गरेको छ।
शुक्रबार र शनिबार गरेर फिल्मले १ करोड ५१ लाख रूपैयाँ ग्रस कलेक्सन गरेको वितरक रोहित कट्टेलले बताए।
उनका अनुसार पहिलो दिन बिहानी शोमा पानीले केही असर गरे पनि दिउँसोबाट फिल्मले पिकअप लिएको थियो। शनिबार बिहानैदेखि फिल्मले राम्रो व्यापार गरेको थियो।
'वर्खामा फिल्म चल्दैन भनेर निर्माताहरू असार, साउनमा रिलिजका लागि डराइरहेको पाइन्थ्यो। राम्रो फिल्म जुनसुकै समयमा पनि चल्दोरहेछ भन्ने घरज्वाइँले प्रमाणित गरेको छ,' वितरक कट्टेलले भने।
आइतबार पनि फिल्मको व्यापार राम्रो रहेको उनले बताए।
अनिल बुढा मगरको लेखन एवं निर्देशन रहेको यो फिल्मको निर्माता जनक घर्ती मगर हुन्।
फिल्ममा दयाहाङ र मिरुनासहित बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन (खबपु), राज थापा, कविता आले लगायतको अभिनय छ।
