डा. सुधा शर्माको संस्मरणात्मक कृति 'सिंहदरबारको घुम्ने मेच' सार्वजनिक भएको छ। डा. शर्मा योग्यताले प्रसूति तथा स्त्री रोग विशेषज्ञ हुन्। उनले २०६५ साल असोजदेखि २०६८ मंसिरसम्म स्वास्थ्य तथा जनसंख्या मन्त्रालयअन्तरगत सचिवको कार्यभार सम्हालेकी थिइन्।
शर्माको पुस्तकमाथि शुभकामना व्यक्त गर्दै पूर्व राष्ट्रपति रामवरण यादवले प्रतिक्रिया व्यक्त गरे 'यो पुस्तकमा तपाईंले आफ्नो प्रशासनिक र डाक्टरी जीवनको सारा अनुभव संगालेर राखिदिनुभएको छ। यसले आउने पुस्तालाई केही सिक्ने मौका दिन्छ।'
यस पुस्तकमा शर्माको निजी साहस र सरकारी सेवामा रहेका सीमित महिला सचिवहरूले सामना गरेका ऐतिहासिक असहजताको वर्णन गरिएको छ जो २०६२-६३ को विद्रोहपछि निर्माण भएको सरकारका निम्तिसमेत चुनौतिपूर्ण रह्यो।
जुन सरकारले महिलाहरूको समानुपातिक प्रतिनिधित्वलाई आफूले सर्वोच्च प्राथमिकतामा राखेको उद्घोष गर्थ्यो, त्यही सरकार सशक्त महिला नेतृत्व स्वीकार्नका निम्ति असहजता महसुस गर्ने रोगले ग्रस्त थियो। प्रकाशक नेपालयका अनुसार यो किताब बुद्धि र व्यंग्यका साथ चनाखो पारामा लेखिएको छ। यो त्यसबेलाका घटनाहरूको चाखलाग्दो दस्तावेज हो, जुन घटनाले २०६३ को विद्रोहलाई निम्त्यायो। साथै 'नयाँ नेपाल'को समायोजनका क्रममा ब्यूरोक्रेसी भित्रको उबडखाबड बाटो हिँड्दाको अन्तरकथा पनि हो यो किताब।
'डा. शर्माको पुस्तक एक महिलाको कथा हो, जसले पितृसत्ताको असक्षम संरचनामाथि उभिएको ऐनाको महललाई प्रहार गर्ने आँटको कथा बोकेको छ,' नेपालय पब्लिकेसन्सका सम्पादक भूषिता वशिष्ठ भन्छिन्, 'यस पुस्तकले नेपालमा पहिचान र लिङ्गमाथि चल्ने छलफल बीच अर्थपूर्ण आयाम थप्नेछ।'
यो किताब नेपालयले यसवर्षका निम्ति तय गरेको महिला शृङ्खला-२०२० अन्तरगतको अन्तिम प्रकाशन हो। यस अघि दुर्गा कार्कीको 'कुमारी प्रश्नहरू' र भुवन ढुंगानाको 'परित्यक्ता' सार्वजनिक भइसकेका छन्।
'महामारी र बन्दाबन्दीका बीच हामी हाम्रा प्रकाशनलाई सुस्तरी तर निरन्तरताका साथ सार्वजनिक गरिरहेका छौं,' नेपालय पब्लिकेसन्सका सिइओ सैजन मास्के भन्छिन्, 'गत महिना हामीले हाम्रो पहिलो प्राइमरी ई-पुस्तक विमोचन गर्यौं। नेपाली पाठकहरूले सहज संचालन गर्नसक्ने प्लेटफर्महरूमा हाम्रा अघिल्ला प्रकाशनहरू अपलोड गर्दै अघि बढ्नु, डिजिटल पहुचलाई दुरुस्त पार्ने हाम्रो प्रयास हो। यसले कठिनाइका बीचमा पनि पुस्तक बजारलाई चलायमान राख्न मद्दत पुर्याउँछ भन्ने हाम्रो विश्वास छ।'
चार सय २५ रूपैयाँ मा उपलब्ध हुने 'सिंहदरबारको घुम्ने मेच' देशका प्रमुख पुस्तक पसलमा सहजै उपलब्ध हुने नेपालयले जनाएको छ। मोटो गातामा पुस्तकको मूल्य भने ५ सय ९५ रुपैयाँ राखिएको छ।
पुस्तक ई-बुकका रुपमा थुप्रै डट कम बाट किन्न सकिने र अमेजनमार्फत् विश्वव्यापी रुपमा उपलब्ध हुने नेपालयले जनाएको छ।
