रूपन्देहीमा १० औं मणिमुकुन्द कप पुरुष भलिबल इन्डो–नेपाल क्लब च्याम्पियनसिप २०८२ हुने भएको छ।
स्वास्थ्यका लागि खेलकुद, राष्ट्रका लागि खेलकुद भन्ने नाराका साथ वैशाख ६ गतेदेखि हुने प्रतियोगितामा एक भारतीय क्लब र तीन विभागीय क्लबसहित ९ टिमको सहभागिता रहने आयोजकले जनाएको छ।
मणिमुकुन्द भलिबल क्लब बुटवलले आयोजना गर्ने यसपटकको प्रतियोगिता दसौं संस्करण हो।
२०७२ सालदेखि हरेक वर्ष भलिबल प्रतियोगिता आयोजना गर्दै आएको क्लबले आठौं संस्करणसम्म जिल्लास्तरीय र गत वर्षको नवौं संस्करण राष्ट्रिय स्तरको आयोजना गरेको थियो।
दसौं संस्करणमा भारतीय क्लबलाई समेत सहभागी गरेर आयोजना गरिएको क्लबका अध्यक्ष लोकेन्द्र भण्डारीले जानकारी दिए।
क्लबले प्रतियोगितामा हरेक वर्ष पुरस्कार राशी समेत थप गर्दै गएको छ। नवौं संस्करणमा उपाधी विजेता टिमलाई २ लाख १ हजार १११ रुपैयाँ प्रदान गरिएकोमा दसौं संस्करणमा आइपुग्दा राशी बढाएर ३ लाख ११ हजार १११ रुपैयाँ पुर्याइएको अध्यक्ष भण्डारीले जानकारी दिए।
भण्डारीका अनुसार पहिलो पुरस्कारको राशी अमेरिकामा व्यवसाय गर्दै आएका तिलोत्तमा–१ का मोती कंडेलले उपलब्ध गराएका छन्।
त्यस्तै, उपविजेता हुने टिमले २ लाख, ११ हजार १ सय ११ प्राप्त गर्नेछ भने तेस्रो हुने टिमले १ लाख ११ हजार १ सय ११ रुपैयाँ र चौथो हुने टिमले पनि प्रोत्साहन स्वरुप ६६ हजार ६६६ रुपैयाँ प्राप्त गर्नेछ।
साथै प्रतियोगितामा विभिन्न ८ विधामा समेत खेलाडीहरुलाई १० हजारदेखि १५ हजार रुपैयाँसम्म पुरस्कार प्रदान गरिने छ।
क्लबका अध्यक्ष भण्डारीले राष्ट्रिय तथा अन्तर्राष्ट्रिय भलिबल खेलाडीको खेल कौशल प्रदर्शन गर्ने र नेपालको राष्ट्रिय खेलको रुपमा रहेको भलिबलको विकास गर्ने उद्देश्यले हरेक वर्ष प्रतियोगिता आयोजना गर्दै आएको बताए।
यसअघिका खेलहरु दिउसोमा आयोजना हुँदै आएकोमा यसपटक भने साँझ ६ बजेदेखि राति १० बजेसम्म चल्नेछन्।
वैशाख महिनामा बुटवलको चर्को गर्मीमा खेलाडीहरुको स्वास्थ्यलाई ध्यानमा राखेर रातिका लागि खेल्ने व्यवस्था गरिएको खेल संयोजक सुरेन्द्र गुरुङले बताए।
गत वर्ष सम्पन्न नवौं संस्करणको राष्ट्रिय भलिबलको उपाधि नेपाल आर्मी क्लबले जितेको थियो।
तिलोत्तमा–२ स्थित क्लबको आफ्नै ‘कोर्ट’मा आयोजना गरिने प्रतियोगिता बैशाख १३ गतेसम्म संचालन हुनेछ।
