काभा क्लब च्याम्पियनसिप जितेको पुलिस क्लबलाई भव्य स्वागत (तस्बिरहरू)

सेतोपाटी संवाददाता

काठमाडौं, असोज ७

सेन्ट्रल एसियन भलिबल एसोसिएसन (काभा) वुमन्स क्लब च्याम्पियनसिपको उपाधि जितेको नेपाल पुलिस क्लब सोमबार विहान स्वदेश फर्किएको छ।

उपाधि विजेता नेपाली टोलीलाई त्रिभुवन विमानस्थलमा भव्य स्वागत गरिएको छ। टोलीलाई प्रहरीका अधिकारीहरूले विमानस्थलमा ब्याण्डबाजाले स्वागत गरेका थिए। साथै पुलिस टोलीका खेलाडी तथा अफिसियलाई पुष्पगुच्छा, र मालाले सम्मान गरिएको थियो। त्यसपछि टोलीलाई फूलले सजाइएको प्रहरी भ्यानमा राखेर त्रिभुवन विमानस्थालबाट ल्याइएकव थियो।

नेपालले माल्दिभ्समा भएको सेन्ट्रल एसियन भलिबल एसोसिएसन (काभा) वुमन्स क्लब च्याम्पियनसिपको उपाधि शनिबार राति जितेको थियो।

शनिबार राति भएको उपाधि भिडन्तमा उज्वेकिस्तानको हुमोलाई ३-० को सोझो सेटमा पराजित गर्दै पुलिस च्याम्पियन बनेको हो।

पुलिसले हुमोलाई २५-१६, २५-२२ र २५-२३ ले पराजित गर्दै उपाधि जितेको हो।

यसअघि पुलिसले समूह चरणमा लगातार पाँच खेलमा जित निकालेको थियो। पुलिसले शुक्रबार भएको अन्तिम खेलमा माल्दिभ्स पुलिसलाई हराउँदा चौथो खेलमा चौथो खेलमा माल्दिभ्सकै वाम्कोमाथि ३-२ को रोमाञ्चक जित निकाल्यो।

यसअघि पुलिसले तेस्रो खेलमा ताजकिस्तानको डाइमेड भलिबल र सोमबार पुलिसले श्रीलंका एयर फोर्सलाई ३-० ले हराएको थियो। नेपालको च्याम्पियन क्लबको हैसियतमा प्रतियोगितामा भाग लिएको पुलिसले आइतबार भएको पहिलो खेलमा उज्वेकिस्तानको हुमो भिसीलाई ३-० को सोझो सेटमा पराजित गरेको थियो।

प्रतियोगितामा नेपाल, माल्दिभ्स, उज्वेकिस्तान, श्रीलंका, ताजकिस्तान र कीर्गिस्तानका क्लबको सहभागिता थियो।