काभा भलिबल नेसन्स लिगको सेमिफाइनल समिकरण पूरा भएको छ। सोमबार आफ्नो अन्तिम खेलमा भारतले श्रीलंकालाई ३-० को सेटमा पराजित गरेसँगै शीर्ष स्थान पक्का गर्यो।
हारसँगै श्रीलंकाले चौथो स्थानमा रह्यो। अब भारत र श्रीलंकाबीच नै सेमिफाइनल हुनेछ।
यता भारतको जितले नेपालको शीर्ष स्थानमा रहने सम्भावना सकिएको छ। अब नेपाल र इरानले सेमिफाइनलमा प्रतिस्पर्धा गर्नेछन्।
नेपालले आफ्नो अन्तिम खेलमा अहिले माल्दिभ्ससँग खेल्दैछ। यो खेलमा जिते पनि नेपाल दोस्रो स्थानमा रहनेछ भने इरान तेस्रो हुनेछ।
दोस्रो र तेस्रो हुने टोलीबीच सेमिफाइनल हुने भएकाले माल्दिभ्सविरुद्धको जितले नेपाललाई कुनै अर्थ राख्ने छैन।
यसअघि आइतबार इरानसँग ३-२ को सेटमा पराजित भएपछि नेपालको शीर्ष स्थानमा पुग्ने सम्भावना कमजोर बनेको थियो।
सेमिफाइनलमा भोलि मंगलबार भारत र श्रीलंकाबीच पहिलो सेमिफाइनल तथा नेपाल र इरानबीच दोस्रो सेमिफाइनल हुनेछ। पर्सी बुधबार प्रतियोगिताको फाइनल हुनेछ।
