नेपाल नम्बर एक एमेच्योर गल्फर सदभाव आचार्य रेकर्ड स्कोरमा ११औं संस्करणको नेपाल एमेच्योर ओपन गल्फ च्याम्पियनसिपको उपाधि जित्न सफल भएका छन्।
नेपालकै राहुल विश्वकर्मालाई १० स्ट्रोकको फराकिलो अन्तरमा हराउँदै सदभाव पहिलो पटक यो च्याम्पियनसिपको उपाधि जित्न सफल भएका हुन्।
गोकर्ण गल्फ क्लबमा सदभावले आज २–अन्डर ७० खेल्दै समग्रमा २०–अन्डर १ सय ९६ को स्कोर खडा गरे। उनले ५४–होलको १८–अन्डरको कूल रेकर्ड समेत तोडे। सदभाव यो प्रतियोगितामा दोहोरो स्वर्णको सफलता प्राप्त गर्न पनि सफल रहे। टिमतर्फ राहुलसँग मिलेर स्वर्ण जिते। उनले दोस्रो दिन १२–अन्डर ६० खेल्दै गोकर्णको कोर्स रेकर्ड पनि तोडेका थिए।
नेपालका राहुल र भारतका सुमित कोटवालले समान १०–अन्डर २ सय ६ को स्कोर बनाए। काउन्ट ब्याकमा राहुल दोस्रो र सुमित तेस्रो भए। राहुलले एक स्वर्ण र एक रजत हात पारे। राहुलले आज ४–अन्डर ६८ को उत्कृष्ट स्कोर निकाले। सुमितले इभन–पार ७२ खेले।
आठ स्ट्रोकको सानदार अग्रतामा अन्तिम दिनको सुरूबात गरेका सदभावले पहिलो र नवौं होलमा बर्डी प्रहार गरे। तर दोस्रो, पाँचौं र छैटौं होलको बोगीले फ्रन्ट नाइन १–ओभर ३७ खेले। ब्याक नाइनमा भने तीन बर्डीको सफलता प्राप्त गरे। १०औं, १४औं र १५औं होलमा एक–एक सट बचाउँदै ब्याक नाइन ३–अन्डर ३३ मा पुरा गरे।
राहुलले आज तेस्रो होलको बर्डीका विरूद्ध छैटौं होलको बोगीले फ्रन्ट नाइन इभन–पार ३६ मा सकाए। ब्याक नाइनमा राहुलले चार होलमा प्रहार गरेको बर्डीले दोस्रो भए। उनले ११औं देखि १३औं होलमा लगातार तीन र १५औं होलमा पनि बर्डी प्रहार गरे। ब्याक नाइन ४–अन्डर ३२ मा सकाउँदा काउन्ट ब्याकमा दोस्रो भए।
सुमित कोटवालले दिनको सुरूवात बोगीबाट गरे। यसपछि तेस्रो, चौथों र नवौं होलमा एक–एक सट बचाएसँगै फ्रन्ट नाइन २–अन्डर ३४ मा सकाए। १२औं होलमा बर्डी प्रहार गर्दा १३औं होलमा एक सट खेर फाले। अन्तिम होलको डबल बोगीले ब्याक नाइन २–ओभर ३८ खेले।
महिलातर्फ भारतकी अनन्थी विवेकले समग्रमा इभन–पार २ सय १६ सहित उपाधि जितिन्। उनले भारतकी दिया क्रिस कुमारलाई १९ स्ट्रोकको फराकिलो अन्तरमा हराइन्। गत संस्करण तेस्रो भएकी अनन्थीले यो पटक उपाधि जितिन्। आज उनले ३–ओभर ७५ स्कोर गरिन्।
दियाले समग्रमा १९–ओभर २ सय ३५ सहित दियाले दोस्रो स्थानमा चित बुझाइन्। उनले आज ८–ओभर ८० खेलिन्। नेपालकी तारा कार्की चित्रकार तेस्रो भइन्। उनले समग्रमा २ सय ५४ स्कोर गरिन्। आज ९१ स्कोर बनाएकी थिइन्।
यु–१६ तर्फ भारतका भिभान उभयाकरले उपाधि जिते। समग्रमा १–अन्डर २ सय १५ स्कोर गरे। आज २–अन्डर ७० स्कोर गर्दा उनले भारतका प्रिन्स बैंस्लालाई ६ स्ट्रोकले हराए। भिभानले फ्रन्ट नाइन २–अन्डर ३४ र ब्याक नाइन इभन–पार ३६ मा सकाए।
प्रिन्सले आज इभन–पार ७२ खेल्दऔ समग्रमा ५–ओभर २ सय २१ स्कोर गरे। नेपालका रूबेन थापाले समग्रमा १३–ओभर २ सय २९ सहित तेस्रो भए। उनले आज ४–ओभर ७६ मा सकाए। काउन्ट ब्याकमा रुबेनले भारतका अड्भय बाग्लालाइ पछि पारे।
नेपाल ’ए’ का सदभाव र राहुल विश्वकर्माले ३६ होलको समाप्तीमा २४–अन्डर २ सय ६४ को स्कोरमा स्वर्ण जित्यो। नेपाल ’ए’ ले १६–अन्डर १ सय २८ को स्कोरमा भुटानलाई २४ स्ट्रोकले हरायो। निम दोर्जी तामाङ र डेचेन लेन्डुपको भुटानी टिम काउन्ट ब्याकमा दोस्रो भयो। भुटान र बङ्गलादेश इभन–पार २८८ मा बराबरी भएपछि काउन्ट ब्याकमा नतिजा आएको हो। सोफिकुल इश्लाम र मोहम्मद सहाब उद्दीन सम्मिलित बङ्गलादेशको टिमले कास्य पदक हात पार्यो।
च्याम्पियन्सिपका विजयी खेलाडीहरुलाई राष्ट्रिय खेलकुद परिषदका सदस्य सचिव टंकलाल घिसिङ, राष्ट्रिय खेलकुद परिषद कार्यकारी समितिका सदस्य कमलबहादुर भट्टराई, नेपाल गल्फ संघका अध्यक्ष टासी घले, नेपाल गल्फ संघका उपाध्यक्ष फुर्साङ लामा र नेपाल गल्फ संघका सदस्य रतन टण्डनले पुरस्कार वितरण गरे।
तीन दिने ५४–होलको प्रतिस्पर्धामा नेपाल सहित दक्षिण एसियाका बङ्गलादेश, भुटान, श्रीलंका र भारतका गरी कुल पाँच राष्ट्रका ५७ खेलाडीको सहभागीता रहेको थियो। यो प्रतियोगिता वल्र्ड एमेच्योर गल्फ र्याङ्किङ (डब्लुएजीआर) द्वारा मान्यता प्राप्त हो। प्रतियोगितामा सहभागी पुरुष तथा महिला खेलाडीहरूले र्याङ्किङ अंक समेत प्राप्त गर्नेछन्।
प्रतियोगिता आयोजनाका लागि राष्ट्रिय खेलकुद परिषद्, बागमती प्रदेश खेलकुद विकास परिषद्, गोकर्ण फरेष्ट गल्फ रिसोर्ट, शिखर इन्स्योरेन्स, सूर्य नेपाल प्रालि, सिटी एक्सप्रेस मनि ट्रान्सफर, सिटिजन्स बैंक, होटल मेची क्राउन, हिमालयन एयरलाइन्स, होटल रोयल सिंगी तथा मेहेन्दो होटल एण्ड स्टुडियो सुइट्सले सहयोग रहेको थियो।
