नेपालका विजय सिञ्जालीले उसुको थाउलो विश्वकपमा ऐतिहासिक कास्य पदक जित्न सफल भएका छन्।
जापानमा भइरहेको विश्वकपमा उनले थाउलोको चेनसु इभेन्टमा कास्य पदक जितेको नेपाल उसु महासंघले जनाएको छ।
उनले कास्य जित्ने क्रममा ९.६३६ अंक जोडेका थिए। उनले प्रतिस्पर्धा गरेको इभेन्टमा ९ खेलाडीले प्रतिस्पर्धा गर्दा मलेसियाका खेलाडीले ९.७७३ अंक जोड्दै स्वर्ण र जापानका खेलाडीले ९.७६६ अंकसहित रजत जित्न सफल भए।
त्रिभुवन आर्मी क्लबका सिञ्जाली नेपाली राष्ट्रिय टोलीका खेलाडी समेत हुन्। उनले सन् २०१९ मा नेपालमा भएको साग गेम्समा स्वर्ण जितेका थिए।
जापानमा भइरहेको प्रतियोगितामा विजयसहित दीपक हमाल, पासाङ शेर्पा, राजीव तामाङ र निमा घर्तिमगर सहभागी छन्।
विजयसहित दीपक हमाल र निमा साग गेम्सका स्वर्ण विजेता खेलाडी हुन्।
