जर्मनीको एसभी मोम्मेन्डोर्फ फुटबल क्लबको मैदानमा हजारौं बालबालिका र सयौं अभिभावकहरूको भीड थियो।
अवसर थियो, क्लबको ५६औं वार्षिक युवा फुटबल प्रतियोगिताको। २० क्लबका ७८ टोलीहरूबीचको प्रतिस्पर्धामा सबैका लागि विशेष बनेको टोली थियो, नेपालको 'काठमाडौं किकर्स फुटबल एकेडेमी'।
लगातार तेस्रो वर्ष जर्मनीको यो प्रतिष्ठित प्रतियोगितामा भाग लिन पुगेको किकर्सले यसपटक पनि आफ्नो प्रदर्शनले सबैको मन जित्यो।
यस वर्ष किकर्सका तीन युवा टोली यू-११, यू-१३ र यू-१६ ले प्रतियोगितामा सहभागिता जनाएका थिए।
३५ खेलाडी, ४ प्रशिक्षक, १ फिजियोथेरापिस्ट र ३ अभिभावक प्रतिनिधिसहितको टोलीले अन्तर्राष्ट्रिय मञ्चमा नेपालको प्रतिनिधित्व गरेको थियो।
प्रतियोगितामा काठमाडौं किकर्सको यू-१६ टोलीले भने सबैको ध्यान खिँच्यो। १० टोली सम्मिलित समूहमा उत्कृष्ट प्रदर्शन गर्दै किकर्सले अन्तिम खेलअघि आफूलाई शीर्ष स्थानमा उभ्याएको थियो।
२३ अंकसहित उपाधिको बलियो दाबेदार बनेको किकर्सको यात्रा अन्तिम खेलमा भने नाटकीय बन्यो। दोस्रो स्थानको टोलीको २२ र तेस्रोको २१ अंक थियो।
तर, अन्तिम खेलमा तेस्रो स्थानको टोलीसँग पराजित भएपछि किकर्सले समान अंक भए तापनि गोल अन्तरका आधारमा तेस्रो स्थानमा चित्त बुझाउनु पर्यो। उपाधिबाट एक कदम टाढा रहनुपरे पनि किकर्सको प्रदर्शन अविस्मरणीय रह्यो।
पदक र अंकभन्दा पर काठमाडौंका युवा खेलाडीहरूले आफ्नो अनुशासन, खेल भावना र दृढताले स्थानीय आयोजक र दर्शकको मन जित्न सफल भए।
सीमित स्रोत र पूर्वाधारका बीच हुर्किएका नेपाली खेलाडीहरूले देखाएको उच्च मनोबल र कलाले उनीहरूको प्रतिभा मात्र होइन नेपालको फुटबलप्रतिको लगावलाई पनि प्रस्तुत गरेकोमा काठमाडौं किकर्स फुटबल एकेडेमीका अध्यक्ष नवीन पाँडे खुसी छन्।
करिब १,००० बालबालिका सहभागी भएको यो विशाल प्रतियोगिता स्वयंसेवकहरूको भरमा चलेको थियो। भान्सादेखि मैदान व्यवस्थापनसम्म सबै काममा स्वयंसेवकहरू खटिएका थिए।
यस्तो व्यवस्थित र भव्य प्रतियोगितामा नेपाली खेलाडीहरूले देखाएको आत्मीयता र सम्मानले उनीहरूलाई खेल मैदानभित्र र बाहिर दुवैतर्फ सफल बनायो।
किकर्सका अध्यक्ष पाँडेले यो सफलतालाई ग्रासरुट फुटबल विकासको आफ्नो अभियानको प्रमाणको रूपमा लिएका छन्।
‘हाम्रो उद्देश्य ग्रासरुटदेखि नै फुटबलको विकास गर्नु हो। जर्मनीको यो प्रदर्शनले हाम्रो अभियान सफल हुँदै गएको पुष्टि गर्छ,’ उनले भने।
