अखिल नेपाल फुटबल संघ (एन्फा) ले वैशाखमा ए डिभिजन क्लबहरू सहभागी लिग कम नकआउट प्रतियोगिता आयोजना गर्ने भएको छ।
सोमबार एन्फा कम्प्लेक्स सातदोबाटोमा एन्फा र ए डिभिजनका १४ क्लबहरू बीच एएफसी क्लब प्रतियोगिता २०२५/२६ सिजनको बारेमा छलफल भएको थियो।
छलफलमा एन्फा महासचिव किरण राईले २०८२ वैशाख २० गतेबाट सो फुटबल प्रतियोगिता आयोजना गर्ने र सो प्रतियोगिताको विजेताले एएफसी क्लब कम्पिटिसन २०२५/२६ मा भाग लिन पाउने प्रस्ताव गरेका थिए।
यो सिजन सहिद स्मारक ए डिभिजन लिग गर्न नसकेको एन्फाले लिग कम नकआउट प्रतियोगिता गर्न लागेको हो। अघिल्लो सिजन लिग विजेता टोली चर्च ब्वाइजले एएफसी क्लब प्रतियोगितामा भाग लिएको थियो।
एन्फा सिइओ इन्द्रमान तुलाधरले प्रतियोगिताको अन्य विषयका बारेमा प्रष्ट पारे।
महासचिवको प्रस्तावमा बैठकमा सहभागी सबै क्लबहरु अत्यन्तै सकारात्मक भइ सहमति जनाएका छन्।
प्रतियोगिताको लागि यहि वैशाख १० गतेभित्र टिम दर्ता र वैशाख १५ गतेभित्र न्यूनतम खेलाडी दर्ता गर्ने सहमति पनि भएको छ।
प्रतियोगितासँग सम्बन्धित अन्य सबै पक्षहरूको बारेमा आगामी दिनमा छलफल जारी राख्ने निर्णय भएको एन्फाको भनाइ छ।
