बेल्जियन मिडफिल्डर केभिन डि ब्रुएनाले इंग्लिस क्लब म्यानचेस्टर सिटी छाड्ने घोषणा गरेका छन्।
ब्रुएनाले सिजनको अन्त्यमा आफ्नो सम्झौता समाप्त भएपछि म्यानचेस्टर सिटी छोड्ने बताएका हुन्।
३३ वर्षीय ब्रुएना सन् २०१५ मा जर्मन क्लब वुल्फ्सबर्गबाट सिटीमा आबद्ध भएका थिए।
उनले सिटीमा आबद्ध भएदेखि १६ ट्रफी जितेका छन्। जसमा छ प्रिमियर लिग उपाधि र २०२३ मा च्याम्पियन्स लिग समावेश छ।
उनले सिटीका लागि सबै प्रतियोगितामा ४१३ खेल खेल्दै १०६ गोल गरेका छन्। यद्यपी यस सिजनमा केवल १९ खेलमा मात्र पहिलो रोजाइमा खेलेका छन्।
उनी सिटीले इंग्लिस लिगमा दबदबा कायम गर्दा टोलीका मुख्य खेलाडी थिए। उनको प्रभावमा सिटीले उत्कृष्ट प्रदर्शन गर्ने गरेको थियो।
‘हरेक कथाको अन्त्य हुन्छ, तर यो निश्चित रूपमा उत्कृष्ट अध्याय भएको छ,’ बेल्जियमका मिडफिल्डरले सामाजिक सञ्जालमा लेख्दै सिटी छाडेको बताएका छन्।
