बुटवलमा जारी २३ औं तिलोत्तमा गोल्डकपको उपाधिका लागि शनिवार विभागिय टिम शसस्त्र प्रहरी (एपिएफ)सँग चर्च व्वाईज युनाइटेड भिड्दै छ।
सहिद स्मारक ए डिभिजन लिग विजेता चर्च ब्वाइज युनाइटेड मेचीनगर गोल्डकपको पनि उपाधि विजेता हो। चर्च ब्वाइज र एपिएपफको भेट यही सिजनको दोस्रो हो। यसअघि बागमती गोल्डकप फुटबल प्रतियोगिताको सातौं संस्करणमा चर्च ब्वाइजले एपिएफलाई सेमीफाइनलमा पराजित गरेको थियो।
चैत ९ गतेदेखि बुटवल ११ देविनगरस्थित एन्फा एकेडेमीको मैदानमा जारी तिलोत्तमा गोल्डकप प्रतियोगितामा चर्च ब्वाइजले पहिलो खेलमा नेपाल पुलिस क्लबलाई ट्राइब्रेकरमा तथा सेमिफाइनलमा मच्छिन्द्र एफसीलाई ४–१ गोल अन्तरले पराजित गर्दै उपाधि नजिक पुगेको छ।
एपिएफले पहिलो खेलमा आयोजक रुपन्देही ११ लाई १–० तथा सेमीफाइनलमा संकटा एफसीलाई १–० गोल अन्तरले पराजित गर्दै फाइनलमा स्थान सुरक्षित गरेको थियो।
जिल्ला फुटबल संघ रुपन्देहीले आयोजना गरेको प्रि-म्याच कन्फरेन्समा दुवै टिमले उपाधिका लागि तयारी अवस्थामा रहेको बताए। एपिएफका कोच टोपबहादुर विष्टले उपाधि जितेर इतिहास रच्ने दाउमा रहेको बताए।
उता मोफसलबाट उदाएर बलियो टिम बनेको चर्च ब्वाइजका प्रशिक्षक आशिक थापामगरले मोफसलको साख जोगाउन उपाधि जित्नैपर्ने बताए।
बुटवल उपमहानगरपालिका संरक्षक रहेको प्रतियोगिताको उपाधि विजेता टिमले गोल्डकपसँगै नगद १२ लाख १२ हजार २ सय २२ रुपैयाँ तथा उपविजेता टिमले ६ लाख, ६६ हजार, ६ सय, ६६ रुपैयाँ प्राप्त गर्नेछन्।
त्यस्तै खेल अवधीभर सर्वोत्कृष्ट घोषित खेलाडीले स्कुटर वा मोटरसाइकल उपहार प्राप्त गर्ने छ। जारी प्रतियोगितामा संकटाका सृजनराज गौतमले व्यक्तिगत ४ गोल गरेका छन् भने चर्च ब्वाइजका अरमान बिउडोनले तीन गोल गरेका छन्।
प्रतियोगितामा विधागत रुपमा पनि उत्कृष्ट गोलरक्षक, डिफेन्डर, मिड फिल्डर, फरवार्ड र कोचलाई जनही नगद ३१ हजार पुरस्कार प्रदान गरिने छ।
प्रतियोगितामा आयोजक रुपन्देही ११ सहित संकटा एफसी, मच्छिन्द्र एफसी, चर्च ब्वाइज युनाइटेड, नेपाल पुलिस क्लब, एपिएफ क्लब तथा दुई विदेशी टिमहरु एडोर्न गडवाल स्पोर्टिङ क्लब र जर्जियन एफसी गरी आठ टिमले प्रतिस्पर्धा गरेका थिए।
मोफसलको ठूलो धनराशीको पुरस्कार मात्र होइन बुटवलको पुरानो र प्रतिष्ठित प्रतियोगिता रहेकोले पनि तिलोत्तमा गोल्डकपलाई महत्वका साथ लिने गरिन्छ।
यसअधि २०७९ सालमा भएको २२ औं संस्करणमा सुदूरपश्चिम-११ लाई हराउँदै मनाङ मर्स्याङ्दी क्लबले उपाधि चुमेको थियो।
मोफसलको पुरानो मानिने तिलोत्तमा गोल्डकपको स्थापना तत्कालीन बुटवल नगर पञ्चायतले २०३१ सालमा गरेको थियो।
तर प्रतियोगिता भने गोल्डकप स्थापना गरेको दुईवर्ष पछि २०३३ सालदेखि मात्र शुरु गरियो। स्थापना गर्दा हरेक वर्ष प्रतियोगिता आयोजना गर्ने भनिए पनि आर्थिक अभावका कारण ४८ वर्षमा बल्ल २३ औं संस्करण आयोजना गरिएको हो।
बुटवल उपमहानगरपालिकाको संरक्षकत्वमा रहेको यो प्रतियोगिता २३ वर्ष बुटवल नगरपालिका आफैले संचालन गर्यो। पछिल्लो २५ वर्षदेखि भने जिल्ला फुटबल संघले सञ्चालन गर्दै आएको छ। आयोजक फेरिए पनि प्रतियोगिता भने नियमित हुन सकेन। तिलोत्तमा गोल्डकपको इतिहासमा दुई/तीन वर्षको अन्तरालमा मात्रै प्रतियोगिता हुँदै आएको छ।
सुरुका प्रतियोगितामा भारत र तेस्रो मुलुकका टिमहरुले समेत सहभागिता जनाउने गरेकोमा यसवर्ष दुई विदेशी टिमसहित आठ टिमको मात्र सहभागिता रहेको छ।
२२ वटा संस्करणमा तीनवटा उपाधि पाहुना टोलीले जितेका छन् भने १८ वटा उपाधि नेपालकै टिमले जितेका थिए। यसअघि २०७५ सालमा भएको २१ औं संस्करणमा दाउफिन्स एफसी क्यामरुनले उपाधि जितेको थियो।
२०३३ सालमा भएको पहिलो गोल्डकप उपाधि सिद्धार्थ खेलकुद परिषद् रुपन्देहीले जितेको थियो। त्यस्तै दोस्रोमा बम्बई फर्टिलाइजर मुम्बई, तेस्रो, नवौं, दशौं र तेह्रौमा महेन्द्र पुलिस क्लब, चौथो, पाँचौ र छैटौंमा कालिका स्पोर्टिङ क्लब र सातौंमा जनकपुर चुरोट कारखाना विजयी भएका थिए।
त्यस्तै आठौंमा आरएनएसी, एघारौंमा महिन्द्रा एण्ड महिन्द्रा मुम्बई, बाह्रौं र सोह्रौमा त्रिभुवन आर्मी क्लब, चौधौं र अठारौंमा रुपन्देही ११, पन्ध्रौमा फ्रेन्ड्स क्लब, सत्रौंमा जावलाखेल युथ क्लब, १९ औं मा सिएमसी संकटा र २० औं संस्करणको उपाधि थ्रिस्टार क्लब काठमाण्डौंले जितेको थियो। फाइनलमा पुगेको जुन टिमले उपाधि जितेपनि तिलोत्तमा गोल्डकप उसको लागि नयाँ हुनेछ।
प्रतियोगिताका संस्करण थपिदै जाँदा पुरस्कार राशी समेत वृद्धि हुँदै गएको छ। यसअघि २०७४ सालमा सम्पन्न २० औं संस्करणमा ७ लाख ७७ हजार ७७७ रुपैयाँ पुरस्कार राशी रहेकोमा २०७५ सालको २१ औं संस्करणमा ८ लाख ८० हजार पुरस्कार राशी पुर्याईएको थियो।
२२ औं संस्करणमा उपाधि विजेताले ११ लाख ११ हजार १११ रुपैयाँ र उपविजेताले ५ लाख ५५ हजार ५५५ रुपैयाँ पुरस्कार प्राप्त गरेका थिए। २३ औं संस्करणमा आईपुग्दा उपाधि विजेताले गोल्डकपसँगै नगद १२ लाख १२ हजार २ सय २२ रुपैयाँ तथा उपविजेता टिमले ६ लाख, ६६ हजार, ६ सय, ६६ रुपैयाँ प्राप्त गर्ने छन्।
-1743222138.jpg)
