सन् २०२६ मा अमेरिका, क्यानडा र मेक्सिकोमा हुने फिफा विश्वकप फुटबल प्रतियोगिताका लागि अहिले संसारभर छनोटका खेल भइरहेका छन्।
२०२६ को विश्वकपमा पहिलो पटक ४८ वटा टोलीले भाग लिँदैछन्। आयोजक तीन टोली अमेरिका, क्यानडा र मेक्सिकोले स्वत: स्थान बनाइसकेका छन्।
चार टोलीले छनोटमार्फत् विश्वकपमा स्थान पक्का गरेको अवस्था छ। आयोजक र छनोट भएका गरी अहिलेसम्म सात टोलीले विश्वकप स्थान पक्का गरेका छन्।
एसियाबाट जापान र इरानले विश्वकप खेल्ने पक्का भइसकेको छ। दुवै टोलीले तेस्रो चरणको छनोटमार्फत् विश्वकपमा स्थान पक्का गरेका हुन्।
यता ओसियाना क्षेत्रबाट न्युजिल्यान्डले पनि विश्वकप खेल्ने पक्का भएको छ।
दक्षिण अमेरिका छनोटबाट अर्जेन्टिना फिफा विश्वकप २०२६ मा पुग्ने पहिलो देश बनेको छ।
विश्वकपमा एसियाबाट ८ टिम, अफ्रिकाबाट ९ टिम, उत्तर अमेरिकाबाट ६ टिम, दक्षिण अमेरिकाबाट ६ टिम, ओसियानाबाट १ टिम र युरोपबाट १६ टिम गरी कुल ४६ टिम छनोट हुनेछन्।
यस्तै युरोपबाहेक अरु क्षेत्रका लागि प्लेअफ कोटा पनि हुनेछ। दुई टिम अन्तरमहादेशीय प्लेअफबाट छनोट हुने प्रावधान छ।
४८ टिमलाई अब चार-चार टिम सम्मिलित १२ समूहमा प्रतिस्पर्धा गराइने भएको छ।
१२ समूहका शीर्ष दुई टिम र तेस्रो स्थानमा रहने उत्कृष्ट ८ टिम गरी कुल ३२ टिम दोस्रो चरणमा पुग्ने फिफाले जनाएको छ। फिफा विश्वकप २०२६ मा तीन देशका १६ सहरमा खेल हुनेछन्।
-1742970708.jpg)
