सहिद स्मारक ए डिभिजन लिग विजेता चर्च ब्वाइज युनाइटेड पछिल्लो समय मोफसलका फुटबल प्रतियोगिताहरूमा पनि छाइरहेको छ।
बुधबार मात्रै विराट गोल्डकप फुटबलको फाइनलमा थ्रीस्टारको हातबाट पराजय भोगेर उपाधि विमुख बनेको चर्च ब्वाइजले शनिबार झापामा मेचीनगर गोल्डकपको उपाधि जितेर खुसीयाली मनाएको छ।
तीन दिनअघि विराटनगरमा उपाधि जित्न नसकेको पीडा काँकडभिट्टा पुगेर बिर्साएको चर्च ब्वाइजले शनिबार सम्पन्न फाइनलमा आयोजक काँकडभिट्टा फुटबल ट्रेनिङ सेन्टरलाई १–० को साँघुरो अन्तरले पराजित गरेको हो।
चर्च ब्वाइजले यसपटक मात्रै झापा गोल्डकप, बागमती गोल्डकप र फाल्गुनन्द गोल्डकपको उपाधि जितिसकेको छ। मेचीनगर गोल्डकपको सफलता पनि अब यो सूचीमा थपिएको छ।
आयोजकलाई हराएपछि चर्च ब्वाइजले नगद १० लाख, ट्रफी र मेडल प्राप्त गरेको छ। उपविजेता बनेको काँकडभिट्टाले नगद ५ लाखमा चित्त बुझाएको छ।
खेलको ११ औँ मिनेटमा चर्च ब्वाइजका समिर तामाङले गरेको एक मात्र गोल चर्च ब्वाइजलाई उपाधि दिलाउन पर्याप्त रह्यो। आयोजकका डिफेन्डर अभिषेक गुरूङले पेनाल्टी एरियामा क्लियर गर्न नसकेको बललाई उनले त्यसको फाइदा लिँदै गोल गरेका थिए।
खेलको प्लेयर अफ द म्याच चर्च ब्वाइजका समिर तामाङ भए। उनले नगद ११ हजार प्राप्त गरे ।
प्रतियोगिताको सर्वोत्कृष्ट खेलाडी आयोजकका खमिरगिल्सन कन्दङ्वा घोषित भए। उनले नगद ५१ हजार प्राप्त गरे।
सर्वाधिक गोल कर्ता चर्च ब्वाइजका अबोयोमी फकुन्ले र मच्छिन्द्रका युसुफ मलिक भए। उनीहरूले जनही नगद २५ हजार र ट्रफ्री प्राप्त गरे। उत्कृष्ट प्रशिक्षक चर्च ब्वाइजका सुमन श्रेष्ठ भए। उनले नगद २१ हजार पाए।
प्रतियोगिताको उत्कृष्ट गोलरक्षक चर्च ब्वाइजकै टिकेन्द्र थापा भए। उनले नगद २१ हजार प्राप्त गरे। उत्कृष्ट डिफेन्स आयोजकका दिवस उराउ भए। उनले नगद २१ हजार रुपैयाँ प्राप्त गरे। उदीयमान खेलाडीको अवार्ड आयोजकका पर्शु राई भए। उनले नगद १५ हजार प्राप्त गरे।
प्रतियोगितामा आयोजक काँकडभिट्टा फुटबल ट्रेनिङ सेन्टर, चर्च ब्वाइज युनाइटेड, मच्छिन्द्र फुटबल क्लब, धरान फुटबल क्लब, झापा एफसी, सशस्त्र प्रहरी बलको एपीएफ एफसी, जर्जियन फुटबल क्लब भारत र उज्वेकिस्तानको व्ल्याक बुल्स सहभागी रहेका थिए।
प्रतियोगिता समापनका अवसरमा फुटबलका माध्यमबाट मेचीनगरलाई चिनाउने विभिन्न खेलाडीलाई सम्मान गरिएको थियो। सम्मानित हुनेहरूमा सन्देश श्रेष्ठ, नरोत्तम गौतम, संगिता राउत, लुना प्रधान, लिला थापा छन्।
