बुटवलमा पुरानो र प्रतिष्ठित तिलोत्तमा गोल्डकप नकआउट फुटबल प्रतियोगिताको २३ औं संस्करण चैतमा हुने भएको छ।
मोफसलको पुरानो र ठूलो पुरस्कार राशीको मानिने तिलोत्तमा गोल्डकपको स्थापना तत्कालीन बुटवल नगर पञ्चायतले २०३१ सालमा गरेको थियो।
यद्यपी गोल्डकप प्रतियोगिता भने २०३३ सालदेखि हुँदै आएको थियो। गोल्डकप सुरु भएको ४८ वर्षको अवधीमा २२ वटा संस्करण पुरा भएका छन्। प्रतियोगिता अन्तर्गत २३ औं संस्करण आगामी चैत ९ गतेदेखि सुरू हुने भएको हो।
रुपन्देही जिल्ला फुटबल संघले गोल्डकप प्रतियोगिताको आयोजना गर्दै छ। आयोजकले आइतबार बुटवलमा पत्रकार सम्मेलन गरि प्रतियोगिताको तयारी तीव्र रुपमा भइरहेको जनाएको छ।
संघका अध्यक्ष लोकबहादुर पुनले प्रतियोगिताको लागि खेल मैदानको मर्मत, सहभागि टिम तथा खेलाडीको आवास लगायतको व्यवस्थापनको काम भइरहेको जानकारी दिए। पुनका अनुसारबुटवल ११ देविनगरस्थित एन्फा एकेडेमीको खेल मैदानमा प्रतियोगिता हुने छ। प्रतियोगिताकै लागि दुई दशकपछि पहिलोपटक खेल मैदानको मर्मतको काम गरिएको पुनले जानकारी दिए।
चैत १६ गतेसम्म संचालन हुने प्रतियोगितामा १० वटा टिमलाई पत्राचार गरिएपनि विदेशी १ र विभागीय ३ सहित आठवटा टिम सहभागि हुनेछन्। पुनका अनुसार आयोजक रुपन्देही–११, संकटा फुटबल क्लब, मच्छिन्द्र फुटबल क्लब, चर्च ब्याईज क्लब, नेपाल आर्मी क्लब, नेपाल पुलिस क्लब, एपिएफ क्लब र एडोर्न गडवाल स्पोर्टिङ क्लब सभागि हुने छन्।
थ्री स्टार क्लब र उज्वेकस्थानलाई पनि सहभागिताको लागि पत्राचार गरिएको पुनले बताए। त्यस्तै गोल्डकपको २२ औं संस्करणको विजेता मनाङ मर्याङ्दी क्लब पनि यसपटक सहभागी नहुने भएको छ।
नेपालमा भइरहेका मुख्य चारवटा गोल्डकप मध्ये तिलोत्तमा गोल्डकप पनि महत्वपूर्ण मध्येको एक हो। स्थापनाको करिब ५ दशकको ईतिहास बोकेको गोल्डकपको पुरस्कार राशी पनि हरेक वर्ष बढाउँदै लगिएको छ।
२३ औं संस्करणसम्म आइपुग्दा गोल्डकप विजेता टिमले उपाधिसँगै १२ लाख २२ हजार २२२ रुपैयाँ प्राप्त गर्ने छ। त्यस्तै उपविजेताले ६ लाख ६६ हजार ६६६ रुपैयाँ प्राप्त गर्ने छ।
२०७९ सालमा सम्पन्न २२ औं संस्करणमा गोल्डकप विजेतालाई उपाधिसँगै ११ लाख ११ हजार १ सय ११ रुपैयाँ तथा उपविजेताले ५ लाख ५५ हजार ५ सय ५५ रुपैयाँ पुरस्कार प्रदान गरिएको थियो।
गोल्डकप प्रतियोगिता अन्तर्गत विधागत उत्कृष्ट खेलाडीहरुलाई गोलरक्षक, डिफेन्डर, मिड फिल्डर, फरवार्ड र कोचलाई जनही ३१ हजार रुपैयाँ तथा सर्वोत्कृष्ट खेलाडीलाई एकथान मोटरसाईकल वा स्कुटर उपहार प्रदान गरिने छ। त्यस्तै प्रत्येक दिनको म्यान अफ दी म्याचलाई नगद ११ हजार १ सय ११ रुपैयाँ प्रदान गरिने अध्यक्ष पुनको भनाइ छ।
कुल १ करोड ८ लाख, ८८ हजार रुपैयाँ खर्च हुने अनुमान गरिएको प्रतियोगिताको लागि बुटवल उपमहानगरपालिकाले ४० लाख रुपैयाँ छुट्याएको छ। उपमहानगरपालिकाका प्रमुख खेलराज पाण्डेले खेलप्रति बुटवल उपमहानगरपालिकाको लगाव र चासो भएकै कारण बुटवल आसपासमा खेलकुदका प्रतियोगिता आयोजना भइरहेको बतााए।
नगरप्रमुख पाण्डेका अनुसार उपमहानगरपालिकाको सहयोग तथा आयोजनामा मात्रै ५८ वटा खेलकुदका कार्यक्रम भईरहेका छन्। नगरप्रमुख पाण्डेले उपमहानगरपालिकाले चालु आर्थिक वर्षका लागि खेलकुदमा मात्रै ४ करोड बजेट विनियोजन गरि विभिन्न काम भइरहेको जानकारी दिए।
बुटवल उपमहानगरपालिका संरक्षक रहेको प्रतियोगिताको लागि यशोदा फुड्स प्रालि र त्रिमुर्ति इण्डस्ट्रिज प्रालि मुख्य प्रायोजक रहेका छन्। त्यस्तै प्रदेश खेलकुद परिषद लुम्बिनी मुख्य सहयोगी संस्थाको रुपमा रहेको छ।
बुटवल उपमहानगरपालिका संरक्षक रहेपनि आर्थिक स्रोत अभावकै कारण गोल्डकप प्रतियोगिता नियमित हुन भने सकेको छैन। शुरुका २३ वर्ष बुटवल उपमहानगरपालिका आफैले संचालन गर्दै आएको गोल्डकप प्रतियोगिता विगत २५ वर्षदेखि जिल्ला फुटबल संघले सञ्चालन गर्दै आएको छ।
आयोजक फेरिएपनि प्रतियोगिता भने नियमित हुन सकेन। तिलोत्तमा गोल्डकपको इतिहासलाई हेर्ने हो भने दुईतिन वर्षको अन्तरालमा मात्रै प्रतियोगिता हुँदै आएको छ।
०३३ देखि ०३५ सालसम्म नियमित भएको प्रतियोगिता त्यसयता ०३९ सालसम्म हुन सकेन। त्यसपछि ०४३ सालदेखि ०५१ सालसम्म सातवर्ष रोकिएको प्रतियोगिता ०५६ सालमा फेरि रोकियो। ०५७ र ०५८ मा दुई वर्ष लगातार संचालन भएपनि ०६४ सालसम्म सञ्चालन हुन सकेन। त्यसपछि ०६५ सालमा संचालन भए पनि ०६६ मा रोकिएर फेरि ०६७ सालमा संचालन भएको थियो।
०६८ देखि ०७० सालसम्म रोकिएको गोल्डकप ०७१ सालमा संचालन भएपनि ०७२ सालमा संचालन हुन सकेन। त्यसपछि ०७३ देखि ०७५ सालसम्म लगातार संचालन भयो। तर २०७६ देखि २०७८ सम्म तिनवर्ष रोकिएको प्रतियोगिता २०७९ सालमा २२ औं संस्करण भएको थियो। गतवर्ष नै हुनुपर्ने २३ औं संस्करणपनि एकवर्ष रोकिएको बल्ल संचालन हुने तयारीमा छ।
सबैभन्दा पुरानो मात्र नभइ यस क्षेत्रकै सर्वाधिक राशीको पुरस्कार राखिएकोले तिलोत्तमा गोल्डकप प्रतियोगितालाई यसक्षेत्रका खेलप्रेमीहरुले विशेष पर्वका रुपमा लिँदै आएका छन्।
