प्रधानमन्त्री कप एकदिवसीय पुरुष राष्ट्रिय क्रिकेट प्रतियोगिता सुरु भएको छ। लुम्बिनी प्रदेशका मुख्यमन्त्री चेतनारायण आचार्यले आइतबार बिहान प्रतियोगिताको उद्घाटन गरेका हुन्।
नेपाल क्रिकेट संघ (क्यान)का अनुसार रुपन्देहीका दुई र दाङको एक गरी तीनवटा क्रिकेट मैदानमा प्रतियोगिता शुरु भएको हो।
प्रदेशका तीन क्रिकेट मैदानमा एकै पटक सुरु भएको प्रधानमन्त्री कप पुरुष एक दिवसीय राष्ट्रिय क्रिकेट प्रतियोगिता अन्तर्गत भैरहवाको सिद्धार्थ रंगशालामा उद्योग, वाणिज्य तथा आपूर्ति मन्त्री दामोदर भण्डारीले क्रिकेट बल हस्तान्तरण गरी खेलको उद्घाटन गरेका थिए।
दाङको देउखुरी अन्तर्राष्ट्रिय क्रिकेट मैदानमा लुम्बिनी प्रदेशका मुख्यमन्त्री चेतनारायण आचार्यले र तिलोत्तमामा रहेको एक्स्ट्राटेक ओभल क्रिकेट मैदानमा तिलोत्तमा नगरपालिकाका प्रमुख रामकृष्ण खाणले प्रतियोगिताको उद्घाटन गरेका हुन्।
दाङमा सुरु भएको प्रतियोगिता मुख्यमन्त्री आचार्यले ब्याटिङ र क्यान अध्यक्ष चतुरबहादुर चन्दले बलिङ गरी उद्घाटन गरे।
सिद्धार्थ रंगशालामा शुरु भएको प्रतियोगिताको उद्घाटन गर्दै उद्योग, वाणिज्य तथा आपूर्ति मन्त्री दामोदर भण्डारीले खेल क्षेत्रको पूर्वाधार विकास, खेलाडीको क्षमता अभिवृद्धि र नयाँ खेलाडी उत्पादनका लागि सरकारले विशेष ध्यान दिएको बताए।
लुम्बिनी प्रदेशका मुख्यमन्त्री आचार्यले खेल पर्यटनले मुलुकको समृद्धि र विकासमा महत्वपूर्ण योगदान पुर्याउने बताए। उनले अन्तर्राष्ट्रिय तथा राष्ट्रिय प्रतियोगिताले विदेशी पर्यटकलाई आकर्षित गरिरहेको उल्लेख गर्दै खेल आर्थिक समृद्धिको आधार बन्दै गएको बताए।
क्रिकेट संघका अध्यक्ष चतुरबहादुर चन्दले काठमाडौं बाहिर पहिलोपटक लुम्बिनी प्रदेशमा प्रधानमन्त्री कप क्रिकेट प्रतियोगिता आयोजना गरेर नयाँ इतिहास रचिएको बताए।
प्रतियोगितामा सात प्रदेश र तीन विभागीय टोलीको सहभागिता रहनेछ। प्रधानमन्त्री कपलाई नेपाली क्रिकेटमा नयाँ खेलाडी उत्पादन गर्ने उत्कृष्ट मञ्चका रुपमा हेरिन्छ।
सिद्धार्थ रंगशालामा भइरहेको खेलमा कोशी र लुम्बिनी प्रदेशबीच प्रतिस्पर्धा भएको छ भने दाङको लमहीस्थित देउखुरी अन्तर्राष्ट्रिय क्रिकेट मैदानमा कर्णाली र सुदूरपश्चिम प्रदेशबिच प्रतिस्पर्धा भईरहेको छ।
त्यस्तै तिलोत्तमा रहेको एक्स्ट्राटेक ओभल क्रिकेट मैदानमा बागमती प्रदेश र एपिएफ क्लबबीच प्रतिस्पर्धा भएको छ।
क्यानका अनुसार चैत्र १६ गतेसम्म चल्ने प्रतियोगितामा कुल ४६ खेल हुनेछन्।
जसमध्ये सिद्धार्थ रंगशालामा १७, एक्स्ट्राटेक मैदानमा १५ तथा देउखुरी अन्तर्राष्ट्रिय क्रिकेट मैदानमा १४ खेल हुनेछन्। फाइनल खेल भने सिद्धार्थ रंगशालामा हुने जनाइएको छ।
प्रतियोगितामा ७ प्रदेश तथा ३ विभागीय टोली नेपाल आर्मी, नेपाल प्रहरी र एपिएफ गरी १० टिम सहभागी छन्। खेल तालिकाअनुसार प्रत्येक टोलीले एक अर्का टिमसँग प्रतिस्पर्धा गर्नेछन्।
प्रधानमन्त्री कपका सबै खेलहरु काठमाडौं बाहिर पहिलो पटक लुम्बिनी प्रदेशमा हुन लागेका हुन्। क्रिकेटको उर्वरभूमी बन्दै गएको लुम्बिनीमा प्रधानमन्त्री कपका खेल सुरु भएपछि लुम्बिनी क्षेत्रका खेलाडी, खेल प्रेमी र स्थानीय उत्साहित बनेका छन्।
