रुपन्देहीको तिलोत्तमामा एक्स्ट्राटेक ओभल क्रिकेट स्टेडियम निर्माणधीन छ।
विनोद कुँवर र उनकी पत्नी सुदिक्षाले ५० करोड लगानी गरेर अन्तर्राष्ट्रियस्तरको क्रिकेट मैदान निर्माण गरिरहेका छन्।
उनीहरू आफैले खरिद गरेको पाँच बिघा जमिनमा २०८० साल जेठ २९ गते क्रिकेट स्टेडियमको शिलान्यास गरेका थिए।
अहिले पाँच वटा फ्लड लाईट जडान गरी परिक्षण भइरहेको छ। योसँगै एक्स्ट्राटेक ओभल क्रिकेट स्टेडियम फ्लडलाइट जडान गरिएको नेपालको पहिलो क्रिकेट मैदान बन्न पुगेको छ।
क्रिकेट खेल्न मिल्ने गरी तयार गरिएको रंगशालाको उद्घाटन भने २०८० फागुन २८ गते नै लिजेण्ड्स कप क्रिकेट प्रतियोगिता आयोजना गरी गरिएको थियो।
रंगशालामा अहिले अन्य भौतिक संरचना निर्माणका काम भइरहेका छन्।
अहिले भिआइपी बक्स, प्लेयर बक्स, चेञ्जिङ रुम र मिडिया बक्स सहितका चाररचार तलाका २ वटा भवन बनिरहेका छन्।
कुँवरका अनुसार ती भवनको चौथो तलाको काम भइरहेको छ भने तत्काल कुनै प्रतियोगिता आयोजना भएको खण्डमा भिआइपी बक्सबाट बसेरै खेल हेर्न सकिने अवस्थामा संरचना निर्माण भइसकेको छ।
निर्देशक कुँवरका अनुसार रंगशालामा नेट प्राक्टिसका लागि समेत छुट्टै पिच तयार भइरहेको छ। जुन अन्तिम चरणमा पुगेको छ। प्यारापिटको काम सुरु भइसकेको छैन। यद्यपि यसै वर्ष ५ हजार क्षमताको प्यारापिट निर्माणको काम अगाडि बढाउने उनको योजना छ।
अर्को वर्षसम्म १० हजार र ५ वर्षभित्रमा २५ हजार दर्शक अटाउने प्यारापिट निर्माण हुने उनले बताए। रंगशाला बनाउने मात्र नभई एकेडेमी सञ्चालन गरेर डिप्लोमा इन क्रिकेट कोर्ष पढाएर अन्तर्राष्ट्रिय स्तरमा खेल्ने नेपाली खेलाडी उत्पादन गर्ने आफ्नो उद्देश्य रहेकोले सोही अनुसारका संरचना निर्माण भइरहेको कुँवरले बताए।
यहाँ नियमित खेल सञ्चालन हुनुको साथै एकैपटक १५० जनालाई एकेडेमीमा राखेर प्रशिक्षण दिइने कुँवरले जानकारी दिए। एक्स्ट्राटेक ओभल क्रिकेट मैदानको क्युरेटरको भूमिकामा युएईमा लामो समय बसेर अवुधावीको शेख जायेद अन्तर्राष्ट्रिय क्रिकेट रंगशालामा क्युरेटरको जिम्मेवारी लिएका माधव पाठक छन्।
विहिबार प्रतिनिधिसभाको शिक्षा, स्वास्थ्य तथा सूचना प्रविधि समितिको टोली स्टेडियम अवलोकन गर्न गएका थिए। त्यसक्रममा कुँवरले काम सुरु गरेको डेढ वर्षमै पाँचवटा फ्लड लाइटसहितको क्रिकेट स्टेडियम तयार गर्न सफल भएको बताए।
कुँवरले नेपालमा सुविधा सम्पन्न क्रिकेट स्टेडियम बनाउने विदेशमा बसेर देखेको सपना सवा दुई वर्षमा पूरा भएको बताए।
सानो उमेरदेखि नै आफूमा क्रिकेट खेलप्रति मोह जागेको भएपनि अस्ट्रेलियामा रहँदा क्रिकेटलाई अझै नजिकबाट बुझ्ने अवसर पाएको र नेपालमा आफ्नै लगानीमा भएपनि क्रिकेट स्टेडियम बनाउनुपर्छ भन्ने सोच आएको सम्झिए।
‘त्यति ठूलो लगानीमा क्रिकेट स्टेडियम बनाउन सक्छ र भन्ने कतिपयको आशंका थियो। मलाई पनि एकातर्फ स्टेडियमको काम द्रुत गतिमा अगाडि बढाउनु थियो भने त्यसको लागि रकम जुटाउनुपर्ने चुनौती थियो। सबैको सकारात्मक सहयोग र उर्जाले आर्थिक संकलन गर्नेमात्र होईन डेढवर्षमै स्टेडियम तयार गर्न सम्भव भएको हो,' उनले भने ।
कुँवरले क्रिकेट स्टेडियम आफ्नो निजी लगानीमा बनेको भएपनि यो सरकारकै सम्पत्ति भएको बताए।
‘स्टेडियममा मैले लगानी गरेको भएपनि यो सरकारकै सम्पत्ति हो सरकारले जतिखेर प्रतियोगिता गर्न चाहन्छ हामी स्टेडियम उपलब्ध गराउँछौं, ‘विदेशमा पनि धेरैजसो निजी क्षेत्रले लगानी गरेका संरचना सरकारकै सम्पत्तिको रुपमा रहेका हुन्छन् यो पनि सरकारकै सम्पत्ति हो,’ उनले भने।
उनले धेरै क्रिकेट खेलाडी उत्पादन गरेको जिल्ला मात्र नभई सबैभन्दा ठूलो क्रिकेटको देशको छेउँमा रहेकोले पनि स्टेडियमका लागि रुपन्देही रोजेको बताए।
‘रुपन्देहीले धेरै क्रिकेट खेलाडी जन्माएको छ, नजिकै सबैभन्दा ठूलो क्रिकेटको देशको सिमाना जोडिएको छ। मेरो परिवार पनि यहिँ बस्ने र तिलोत्तमा नेपालकै उत्कृष्ट नगरपालिका भएकोले पनि यहि क्षेत्रलाई रोजेको हुँ,’ कुँवरले भने।
नेपालीलाई एकअर्कासँग जोड्ने र नेपाललाई विश्व सामु चिनाउने क्रिकेट खेल नै भएको उल्लेख गर्दै उनले सरकारले क्रिकेट लगायत अन्य खेल क्षेत्रमा लगानी गर्नुपर्ने बताए।
कार्यक्रममा प्रतिनिधिसभा शिक्षा, स्वास्थ्य तथा सुचना प्रविधि समितिका सभापति अमर बहादुर थापाले सरकारबाट नीजि क्षेत्रमा भएका लगानीलाई आवश्यक सहयोग गर्न जरुरी रहेको बताए।
‘खेल क्षेत्रमा नीजि क्षेत्रले गरेको यो लगानी अन्य युवाहरुलाई समेत उदाहरण बनेको छ, अहिले जसरी खेल पर्यटनको विकास भएको छ त्यसबाट मुलुकको आर्थिक समृद्धिमा टेवा मिल्ने छ,’ थापाले भने।
समितिका सदस्य देवेन्द्र पौडेलले खेल पूर्वाधारमा निजी क्षेत्रबाट भएको लगानीमा नयाँ शुरुवात भएको निजि क्षेत्रबाट अर्थ लगानी भएको स्थलमा सरकारको सहयोग सधै रहने उनले बताए।
‘नीजि क्षेत्रले लगानी गरेको भएपनि सरकारबाट आवश्यकता महशुस गरेर नै अहिले हामीहरु अध्ययनमा आएका हौं, स्टेडियमलाई गर्नुपर्ने सहयोग सरकारको तर्फबाट रहनुपर्छ,’ भने।
समितिका अर्का सदस्य छविलाल विश्वकर्माले क्रिकेट खेलबाट देशको नाम विश्वमा नै चिनिएको भएपनि पूर्वाधार निर्माणमा भने धेरै ढिला भएको बताए।
‘सरकारको मुख ताक्ने प्रवृत्तिलाई अन्य हुने गरि एक्स्ट्राटेक क्रिकेट स्टेडियम तयार भएको छ, अन्य क्षेत्रजस्तै खेल क्षेत्रमा गरिएको लगानी पनि व्यवसायिक बन्न सक्छ भन्ने यसले उदाहरण प्रस्तुत गरेको छ,’ उनले भने।
तिलोत्तमा नगरपालिकाका प्रमुख रामकृष्ण खाणले स्टेडियमलाई सडक संजाल, विद्युत र सुरक्षा मुख्य आवश्यकता रहेको भन्दै यसका लागि नगपालिकाबाट पहल गरिरहेको बताए।
कार्यक्रममा उपप्रमुख जागेश्वरी चौधरी, रुपन्देहीका प्रमुख जिल्ला अधिकारी बासुदेव घिमिरे, नेपाल पत्रकार महासंघका अध्यक्ष दिनेश पाण्डे, पत्रकार दीपेन्द्र कुँवरले खेलकुदको उर्वरभुमीका रुपमा चिनिएको रुपन्देहीमा नयाँ गहना थपिएको भन्दै यसलाई सरकारबाट आवश्यक सहयोग जरुरी रहेको बताए।
