पूर्व पश्चिम राजमार्ग अन्तरगत दाङ र बाँके जिल्लामा भएका दुईवटा बस दुर्घटनामा तीन जनाको मृत्यु भएको छ भने दुई दर्जन बढी यात्रु घाइते भएका छन्।
मंगलबार काठमाडौंबाट यात्रु बोकेर धनगढीतर्फ जाँदै गरेको ना ४ ख ८२५५ नं. को यात्रुबाहक बस बाँकेको राप्ती सोनारी गाउँपालिका वडा नं. १ लौकी खोलामा दुर्घटनामा हुँदा दुईजनाको घटनास्थलमै मृत्यु भएको छ।
दुर्घटना हुँदा एक जना पुरुष र एकजना महिलाको घटनास्थलमै मृत्यु भएको भएपनि यो खबर तयार पार्दासम्म पहिचान हुन नसकेको प्रहरीले जानकारी दिएको छ । उक्त दुर्घटनामा परि ११ जना यात्रु गम्भीर घाइते भएको र उनीहरूको उपचार कोहलपुर मेडिकल कलेजमा भइरहेको पनि प्रहरीले बताएको छ।
मंगलबार बिहान साढे १० बजेतिर बस सडकबाट १५ फिट तल खोलामा खसेको प्रहरीले बताएको छ। दाङको सीमाना नजिकै बस दुर्घटना परेपछि दाङको अमेलियाबाट समेत प्रहरी उद्धारमा पुगेको दाङका निमित्त प्रहरी प्रमुख भूवनेश्वर तिवारीले जानकारी दिए।
यसअघि दाङमा गएराति भएको सवारी दुर्घटनामा परि एकजनाको मृत्यु भएको थियो भने १० जना गम्भीर घाइते भएका थिए ।
पूर्व पश्चिम राजमार्ग अन्तरगत लमही नगरपालिका वडा नं. ८ सतबरीयामा गए राति यात्रुबहाक बस र ट्रक एक आपसमा ठोक्किदा बर्दिया जिल्लाको राजापुर १० निवासी ३६ वर्षिय रामकृष्ण चौधरीको मृत्यु भएको वडा प्रहरी कार्यालय लमहीका प्रमुख सुरज खड्काले जानकारी दिएका छन् । गम्भीर घाइते चौधरीको उपचारका क्रममा राति नै कोहलपुर मेडिकल कलेजमा मृत्यु भएको खड्काले बताए।
बर्दियादेखि काठमाडौं जाँदै गरेको ना ४ ख ७४५९ नं.को यात्रुबाहक बस र पूर्वबाट पश्चिमतर्फ आउँदै गरेको लु २ ख २६५ नं. को तीव्र गतिको ट्रक गएराति साढे ९ बजेतिर एक आपसमा ठोक्किदा उक्त दुर्घटना भएको प्रहरीले जानकारी दिएको छ । बसमा सवार १० जना घाइतेलाई दाङमा प्रारम्भीक उपचारपछि थप उपचारका लागि राति नै कोहलपुर ‘रेफर’ गरिएको प्रहरीले जानकारी दिएको छ ।
