काठमाडौंको क्षेत्र नम्बर १० मा लगातार तीन वटा चुनाव जितेका नेपाली कांग्रेसका नेता राजेन्द्रकुमार केसी अब चुनाव नलड्ने भएका छन्।
प्रतिनिधि सभा प्रत्यक्ष, समानुपातिक वा राष्ट्रिय सभामा अब चुनाव नलड्ने उनले बताए। पार्टीलाई रूपान्तरण र पुस्तान्तरण गर्नुपर्ने भएकोले आफूबाटै यो कामको अगुवाइ गरेको केसी बताउँछन्।
पार्टीका पक्षमा मताधार र संगठन कमजोर रहेका बेला आफू पटक-पटक निर्वाचन लडेर जितेको बताएका उनले अब काठमाडौं १० मा पार्टीको मताधार र संगठन दुवै राम्रो भइसकेकोले जो उठे पनि सहज हुने बताए।
केसी २०७०, २०७४ र २०७९ मा काठमाडौं १० बाट निर्वाचित भएका थिए।
७ पटक चुनाव जितेका सभापति शेरबहादुर देउवा अन्तिम पटक डडेल्धुराबाट चुनाव उठ्ने तयारीमा रहँदा केसीले भने अब आफू चुनाव नलड्ने निष्कर्षमा पुगेका छन्।
२०७० सालको दोस्रो संविधान सभा निर्वाचन तत्कालीन माओवादी अध्यक्ष पुष्पकमल दाहाल 'प्रचण्ड' चुनाव लडेकोले यस क्षेत्र चर्चामा थियो। केसीले प्रचण्डलाई पनि हराएका थिए।
कांग्रेसले कीर्तिपुर क्षेत्रलाई वामपन्थीको 'लालकिल्ला'को रूपमा लिन्थ्यो। २०१५ सालदेखिका चुनाव कांग्रेसले जितेको थिएन तर केसीले 'लालकिल्ला' भत्काउँदै प्रचण्डलाई हराए र त्यसपछिका चुनाव पनि जितिरहे।
उनै केसी अब भने चुनाव नलड्ने भएका छन्।
यसै सन्दर्भमा नेता राजेन्द्रकुमार केसीसँग गरिएको कुराकानी;
तपाईंले अब चुनाव लड्दिनँ भन्नुभएको रहेछ, किन हो?
हो, अब म चुनाव लड्दिनँ। म काठमाडौं १० बाट तीन पटक चुनाव जितेँ, एकै पदमा धेरै समय रहेँ। अब पनि म यहाँबाट चुनाव लड्ने हो भने हाम्रो पार्टीका युवा नेताहरूको अवसर र क्षमता सबै ह्रास हुन्छ। युवा, महिला, जनजाति सबैलाई अघि बढाउनुपर्छ भन्ने लाग्यो।
भनेपछि रूपान्तरण र पुस्तान्तरणका लागि चुनाव नलड्ने?
हो, अब पार्टीमा युवा, महिलालगायत आउनुपर्छ, सबैले अवसर पाउनुपर्छ। आफू चाहिँ सधैं एकै पदमा बसिराख्ने, चुनाव लडिराख्ने अनि भाषणमा युवा, तरूण, रूपान्तरण र पुस्तान्तरणको कुरा गरेर हुँदैन, आफैले बाटो खोलिदिनुपर्छ।
२०१५ सालेदेखि पटक पटक बहुमत ल्याएको कांग्रेसको अहिले अवस्था त्यति राम्रो छैन, पार्टीलाई सुदृढीकरण गर्नुपर्नेछ। त्यसका लागि हामीजस्ता पटक पटक अवसर पाएकाहरूले छाड्नुपर्छ भन्ने लाग्छ। चुनावमा अब युवालाई प्राथमिकताका साथ स्वागत गर्नुपर्छ भन्नेमा म उभिएको छु।
पार्टीमा रूपान्तरण र पुस्तान्तरण आवश्यक छ भनेर जेनजी आन्दोलनपछि लागेको हो?
होइन, मैले यो कुरा २०७९ को चुनाव जितिसकेपछि पार्टीका साथीहरूलाई बोलाएर भनेको थिएँ- मैले लगातार जितेँ, मन्त्री पनि भएँ, अब म मात्रै यो पदमा बसिराख्नु राम्रो हुँदैन, त्यसले साहरूको ऊर्जा ह्रास हुन्छ भनेको थिएँ। अस्ती मंसिर २३ गते उम्मेदवार सिफारिस गर्ने बेला अब म उम्मेदवार हुन्न भनेर फेरि पार्टीमा र सार्वजनिक रूपमा भनेको हुँ।
अब काठमाडौं १० को उम्मेदवार को हो?
त्यो अहिले नै थाहा भइसकेको छैन। पाँच/सात जना साथीहरूले इच्छा गर्नुभएको छ। कांग्रेसमा धेरै साथीहरू हुनुहुन्छ, उम्मेदवारको कमी हुँदैन नि!
काठमाडौं १० मा तपाईंले व्यक्तित्वको कारण जितेको कि संगठनले? प्रचण्डलाई हराउँदा तपाईंको चर्चा भएको थियो
अहिले यहाँ हाम्रो पार्टीको संगठन धेरै राम्रो भइसकेको छ। पहिले त कीर्तिपुर वामपन्थीहरूको लालकिल्ला हो, त्यही भन्थे। काठमाडौं १० भित्र रहेका चन्द्रागिरि, कीर्तिपुर र दक्षिणकाली तीनै वटा नगरपालिका कांग्रेसले जितेको छ। प्रदेश सभाहरू पनि जितेको अवस्था छ, पुकार महर्जनजी मन्त्री पनि भइसक्नुभएको छ। यहाँ बलियो घर निर्माण भएको छ, अब यसलाई राम्रोसँग सजावट गरेर संरक्षण गरेर बस्नुपर्छ।
अब तपाईं राजनीति नै छाड्ने हो कि, पार्टी महाधिवेशन आउँदैछ, त्यसको तयारीमा हो कि?
म आफै लगातार चुनाव जितिरहेको ठाउँमा अब उठ्दिनँ भनेपछि राष्ट्रिय सभा वा समानुपातिक कतै जान्न। चुनाव नउठ्ने भन्दैमा राजनीति छाडेको हुँदैन। निर्वाचित हुने र लाभको पद मात्रै छाड्छु भनेको हो। म अहिले पार्टी केन्द्रीय सदस्य छु, पार्टीकै केन्द्रीय कुनै भूमिका रहेर काम गर्छु, पार्टीलाई बलियो बनाउन लागिपर्छु।
१५ औं महाधिवेशन आउँदैछ, केही पदमा उठ्ने तयारी हो कि!
अहिले म केन्द्रीय सदस्य छँदैछु। अब पनि कम्तीमा केन्द्रीय समितिमै रहुँला।
-1765435515.jpg)
-1763886130.jpeg)
-1746009348.jpg)
