नेपाली कांग्रेस केन्द्रीय समितिले महाधिवेशनबारे निर्णय लिन सकेको छैन।
शेरबहादुर देउवा नेतृत्वको यो केन्द्रीय समितिको कार्यकाल मंसिर मसान्तमा सकिँदैछ।
त्यसैले १५ औं महाधिवेशन गर्नुपर्ने आवाज कांग्रेसभित्र बलियो बन्दै गएको छ।
५४ प्रतिशत महाधिवेशन प्रतिनिधिहरूले विशेष महाधिवेशन माग गरेका छन्। तर चुनावअघि महाधिवेशन गर्ने कि नगर्ने, गरे नियमित वा विशेष के महाधिवेशन गर्ने भन्नेबारे कांग्रेसभित्र मतभेद छ।
सभापति देउवा पक्षका केन्द्रीय सदस्यहरू चुनावअघि महाधिवेशन गर्नुपर्ने र चुनावपछि मात्रै महाधिवेशन गर्नुपर्ने पक्षमा विभाजित छन्।
चुनावअघि महाधिवेशन गर्नुपर्ने पक्षमा रहेकी केन्द्रीय सदस्य डिला संग्रौला पन्तसँग हामीले महाधिवेशन कार्यतालिकाकेन्द्रित कुराकानी गरेका छौं;
चुनावअघि कांग्रेसको १५ औं महाधिवेशन गर्नुपर्छ भनेर तपाईंसहित २७ जना केन्द्रीय सदस्यले पहल गरिराख्नुभएको छ तर केन्द्रीय समितिले महाधिवेशन कार्यतालिका ल्याएको छैन, चुनावअघि महाधिवेशन हुन्छ भन्नेमा विश्वस्त हुनुहुन्छ?
फागुन २१ गतेको प्रतिनिधि सभा निर्वाचनअघि पार्टीको महाधिवेशन हुन्छ। अब मंसिर ११ गते बस्ने केन्द्रीय समिति बैठकले नियमित महाधिवेशन कार्यतालिका ल्याउँछ भन्ने हामीलाई विश्वास छ।
नियमित महाधिवेशन कार्यतालिका छिटो ल्याउनुपर्छ भनेर सभापति, कार्यवाहक सभापति, दुवै जना महामन्त्री र आज नेता शेखर कोइरालासँग पनि हाम्रो प्रतिनिधिमण्डलले कुराकानी गरेको छ। विशेष महाधिवेशन माग गर्दै ५४ प्रतिशत महाधिवेशन प्रतिनिधिहरूले हस्ताक्षर गर्नुभएको छ, भोलि उहाँहरूसँग पनि हामी कुराकानी गर्छौं। नियमित महाधिवेशन गरेर उहाँहरूको मागलाई पनि सम्बोधन गरौं भन्ने हिसाबले हामीले कुराकानी गर्न लागेका छौं।
सभापति शेरबहादुर देउवा पक्षकै केही पदाधिकारी र पूर्वपदाधिकारीले चुनावअघि महाधिवेशन गर्न सकिँदैन, वैशाखमा गर्ने हो भन्ने अडान राखेको अवस्था छ, यस्तो अवस्थामा चुनावअघि महाधिवेशन होला?
हिजोको केन्द्रीय समिति बैठक र निर्णय हेर्दा सबै जना नेताहरू एकै ठाउँमा आइपुगेकोजस्तो मलाई लागेको छ। केन्द्रीय समितिमा अब महाधिवेशन कार्यतालिका एउटा मात्रै एजेन्डा बाँकी रहेको छ, बाँकी एजेन्डा सर्वसम्मत नै आयो र अनुमोदन भयो। सबै जना नेताहरू महाधिवेशनबारे गम्भीर नै रहेको मैले पाएको छु।
अहिले महाधिवेशनको आवश्यकता किन छ?
नेपाली कांग्रेसमा विधानअनुसार चार वर्षमा महाधिवेशन गर्नुपर्ने हुन्छ। चार वर्षमा गर्नुपर्ने अधिवेशनलाई त्यसै धकेल्न हुँदैन। त्यसो गरिए पार्टीभित्र ऊर्जा र तागत आउँदैन। भदौ २३ र २४ गतेको जेनजी पुस्ताको आन्दोलन पछि नेपाल पनि फेरिएको छ, राजनीति पनि फेरिएको छ। जेनजी पुस्ताका माग र एजेन्डालाई पनि सम्बोधन गर्नुपर्ने छ र युवाको पनि प्रतिनिधित्व गर्न पार्टीमा नियमित महाधिवेशन त चाहियो। युवाहरूले पार्टीमा पनि ४० प्रतिशत प्रतिनिधित्व आवश्यक पर्छ भनिराख्नुभएको छ।
क्रियाशील सदस्यता छिनोफानो गर्न नै ६ महिना लाग्छ भनेर नेताहरूले भन्ने गरेका छन्, तपाईंलाई के लाग्छ?
मंसिरभित्र क्रियाशील सदस्यता नवीकरण र नयाँ वितरण सकेर टुंगो लगाइयो भने पुसदेखि अधिवेशन सुरू गर्न सकिन्छ। त्यसअनुसार ७ तहको अधिवेशन गर्ने गरी केन्द्रीय समितिले कार्यतालिका ल्याउनुपर्छ। दुई दिनको आन्दोलनले नेपाल बेग्लै हुने अनि यत्रो आन्दोलनपछि पनि आफ्नो पार्टीको महाधिवेशन गर्न सकिँदैन भन्नु हुँदैन भन्ने उद्देश्यसाथ हामीले मध्यमार्गी धार र बीचको बाटो लिएर हामीले पहलकदमी लिइरहेका छौं।
नियमित वा विशेष कुनै पनि महाधिवेशन नभई फागुन २१ को चुनावमा जाने सम्भावनाचाहिँ छ कि छैन?
छैन छैन। त्यस्तो सम्भावना देख्दिनँ। त्यस्तो हो भनेचाहिँ नेपाली कांग्रेस जनताको बीचमा नगए हुन्छ, के भनेर जाने?
भोट माग्ने आधार रहँदैन भन्न खोज्नुभएको?
हो, त्यो आधार पनि सिद्धिन्छ।
५४ प्रतिशतले विशेष महाधिवेशन मागेका छन्, उनीहरूलाई कसरी नियमित महाधिवेशनमा ल्याउन सकिन्छ?
यसका लागि भोलि हामी विशेष महाधिवेशन पक्षधरहरूसँग कुराकानी गर्छौं र केही बाटो खोज्छौं। त्यसपछि हामी एउटा प्याकेज ल्याउँछौं। विशेष महाधिवेशन पनि विधानसम्मत छ। मंसिरमा यो केन्द्रीय समितिको कार्यकाल सकिने भएकोले नियमित महाधिवेशन पनि विधानअनुसार गर्नैपर्ने छ।
नियमित महाधिवेशन कार्यतालिका केन्द्रीय समितिबाट ल्याउने र पछि सार्ने खेल खेलिँदै छ भनेर विशेष महाधिवेशन माग गर्नेहरू आशंका गर्छन्, त्यस्तो हो?
उहाँहरूलाई विशेष महाधिवेशन निस्तेज गर्न खोज्यो कि भन्ने आशंका लागेको छ। नियमित महाधिवेशन कार्यतालिका ल्याएर पछि फेरि मिति सार्छन् कि भन्ने पनि लागेको छ। त्यसैले हामी २७ जना केन्द्रीय सदस्यहरूले सबैलाई एकजुट बनाउन र विश्वास वातावरण बनाउन पहल गरिरहेका छौं। हामी गुटभन्दा माथि र कसलाई सभापति बनाउने भन्ने कुराभन्दा पनि पार्टीलाई निकास दिनका लागि पहल गरिरहेका छौं।
महाधिवेशनले के के कुरा प्रष्ट पारेर जानुपर्छ भन्ने लाग्छ?
जेनजी आन्दोलन किन थियो? भ्रष्टाचार अन्त्य गर्दै सुशासन र पारदर्शीता, बेरोजगारी अन्त्य गर्नलाई थियो। त्यो काम गर्नुपर्यो।
हामीले विगतमा संविधान संशोधनका कुरा पनि उठाएका थियौं, के के संशोधन गर्नुपर्छ पहिचान गरेर टुंगोमा पुर्याउनुपर्यो। नयाँ नेपाल बनाउने हो भने बोल्ने मात्र हो कि त्यसअनुसार कामको पनि तयारी गर्ने हो।
धेरै युवाहरू विदेशिएका छन्, बाँकी स्वदेशमा छन्। अहिले ती युवा आन्दोलनमा छन्। यो अवस्थाबाट माथि जान पनि हामी रूपान्तरण हुनैपर्छ। सोचअनुसार काम पनि गर्नुपर्छ, विगतमा बोल्ने तर काम नगर्ने चाहिँ हाम्रो कमजोरी रह्यो।
त्यसैले हामीले फागुन २१ गतेको निर्वाचनभन्दा अगाडि महाधिवेशन गरौं भनेका छौं। त्यो निर्वाचनमा नयाँ चेहरा, नयाँ सोच, नयाँ भावना र नयाँ एजेन्डासहित जानुपर्छ भन्ने हाम्रो भनाइ हो। यसका लागि पनि महाधिवेशन अपरिहार्य छ।
-1763886130.jpeg)
-1746009348.jpg)
