नियमित वा विशेष के महाधिवेशन गर्ने र चुनावअघि वा पछि कहिले गर्ने भन्नेमा नेपाली कांग्रेस अलमलिएको छ।
असोज २८ गते केन्द्रीय समिति बैठकमा उपस्थित भएर सभापति शेरबहादुर देउवाले उपसभापति पूर्णबहादुर खड्कालाई कार्यवाहक सभापति तोकेपछि खड्काकै अध्यक्षतामा केन्द्रीय समिति बैठक बस्दै आएको छ तर १५ औं महाधिवेशन कार्यतालिका अझै जारी भएको छैन।
महामन्त्री गगन थापाले पुस १६ देखि १९ गतेसम्म १५ औं महाधिवेशन गर्ने गरी केन्द्रीय समितिमा प्रस्ताव पेस गरेका छन् तर सभापति देउवानिकट सहमहामन्त्री महेन्द्र यादवले वैशाख मसान्तमा महाधिवेशन उपयुक्त भन्दै समय माग गरी धारणा राखेको अवस्था छ।
सभापति देउवाले कार्यवाहक सभापति तोक्दै गर्दा समयमै महाधिवेशन गर्न भनेका थिए। २०७८ मंसिर २४ देखि २८ गतेसम्म १४ औं महाधिवेशन भएको र विधानअनुसार नियमित कार्यकाल ४ वर्ष भएकोले मंसिरभित्रै १५ औं महाधिवेशन गर्नुपर्ने मत पनि कांग्रेसभित्र छ। तर चुनावअघि कि पछि महाधिवेशन गर्ने भन्ने मुख्य मतभेद छिनोफानो गर्न नसक्दा कांग्रेस अलमलिएको अवस्था छ।
यसै सेरोफेरोमा रहेर नेपाली कांग्रेसका सहमहामन्त्री बद्रीप्रसाद पाण्डेसँग सेतोपाटीले गरेको कुराकानी:
नेपाली कांग्रेसमा नियमित र विशेष महाधिवेशन माग भइरहेको छ, नियमित गर्ने कि विशेष महाधिवेशन? तपाईंलाई के लाग्छ?
नियमित महाधिवेशनकै कुरा अघि बढेको छ। मैले मात्र होइन कि अधिकांशले नियमित नै भन्नुभएको छ। विशेष महाधिवेशन माग गर्ने साथीहरूले पनि समयमै नियमित महाधिवेशन हुन्छ भने नियमित नै गरौं भन्ने खालको कुरा गर्नु भएको छ।
नियमित महाधिवेशनबारे मतभेद देखिन्छ, फागुन २१ को चुनावअघि गर्ने कि पछि वैशाखमा भन्ने छ। कहिले गर्नुपर्छ महाधिवेशन?
चुनावअघि नै महाधिवेशन गर्नुपर्छ भनेर त पुस १६ गतेदेखि १९ गतेसम्मको कार्यतालिका प्रस्ताव भएको छ, केन्द्रीय समितिमा। महामन्त्री गगन थापाजीले प्रस्ताव गर्नुभएको कार्यतालिका हामीहरूसँग सल्लाह भएरै गरिएको हो। मंसिर मसान्तभित्र महाधिवेशन गर्न भ्याउने स्थिति भएन, दिनहरू घट्दै गए। केन्द्रीय समितिमा छलफल बढ्दै जाँदा उता दिनहरू घट्दै गए। मंसिर मसान्तमा महाधिवेशन गर्न नभ्याउने भएकोले १५ औं महाधिवेशन पुस १६ गते उद्घाटन गर्ने गरी कार्यतालिका प्रस्तावित भएर आएको हो। त्यसै मितिमा जसरी पनि महाधिवेशन गरौं, सबैले मिहनेत गरेर भन्ने छ।
महामन्त्रीले प्रस्ताव गरेको कार्यतालिकामा नेताहरूले बलियोसँग समर्थनमा बोलेका छैनन् भन्ने पनि छ, के हो?
त्यस्तो होइन, नेताहरूको समर्थन नै त्यही मिति (पुस १६ देखि १९ गतेसम्म) महाधिवेशन गर्नुपर्छ भन्नेमा छ। कतिपय साथीहरूले सार्वजनिक रूपमा बोल्नु भएको छैन तर त्यो मितिमा महाधिवेशन सम्भव र उपयुक्त हुन्छ भनेर नै प्रस्ताव गरिएको हो। यही मितिमा महाधिवेशन उपयुक्त हुन्छ भन्ने मत नै देख्छु म।
संस्थापनइतरको धारणा पुस १६ देखि १९ मै महाधिवेशन गर्न सकिन्छ भन्ने हो?
हो, हो त्यही नै हो।
नेता शेखर कोइरालाले यसबारे बोल्नुभएको छैन भन्ने छ, तपाईंको कुराकानी हुन्छ होला, के हो तपाईंहरूको समूहको धारणा?
शेखर दाइले नै हामीलाई सुरूमा यो मितिमा उपयुक्त हुन्छ महाधिवेशन भनेर भन्नुभएको हो।
सभापति देउवा पक्षका नेताहरूले वैशाखमा महाधिवेशन भनिराख्नुभएको छ, अहिलेकै नेतृत्व लिएर चुनावमा जान सकिन्छ कि सकिँदैन, तपाईंलाई के लाग्छ?
अरू पार्टीले पनि महाधिवेशन गर्ने भनेका छन्, महाधिवेशन गरे पनि ती पार्टीमा नेतृत्व परिवर्तन नहुने देख्छु। कांग्रेसले महाधिवेशन गरेमा नेतृत्व परिवर्तन हुन्छ नै। महाधिवेशन गर्न सके नेतृत्व परिवर्तन हुन्छ। अरू पार्टीले महाधिवेशन गरे पनि पुरानै नेतृत्वमा जान्छन् हामी त नयाँ नेतृत्व लिएर चुनावमा जान्छौं। त्यो हुनासाथ हाम्रो पार्टीप्रतिको विश्वास ह्वात्तै बढ्छ। किनभने अधिवेशन गरे पनि एमाले र नेपाली कम्युनिष्ट पार्टीले पुरानै नेतृत्वलाई निरन्तरता दिने सम्भावना देखिँदैछ।
हामी अधिवेशन गर्नासाथ नयाँ नेतृत्व आउँछ। सभापति शेरबहादुर देउवाज्यूले छोड्छु भन्नुभएकै छ, विधानले पनि दुई पटकभन्दा बढी उम्मेदवार बन्न नपाउने भनेकैछ। अधिवेशन सबै दलले गर्दैगर्दा पनि हाम्रो अधिवेशन सार्थक हुन्छ। किनभने हामीले नेतृत्व नै नयाँ ल्याउँछौं।
महाधिवेशन चुनावअघि सबै पार्टीका तोकिने देखिन्छ, हाम्रो पनि तोकिने नै भयो। महाधिवेशन सम्भव तुल्याउन सकियो भने नयाँ नेतृत्व आउने भएकोले सार्थक महाधिवेशन चाहिँ हाम्रो हुने भयो। नेतृत्व चयनसँगै हामी चुनावमा जान्छौं, त्यसकारण चुनावअघि महाधिवेशनको चौतर्फी महत्त्व देख्छु।
अन्तिममा, चुनावपछि महाधिवेशन गर्ने स्थिति आएमा विशेष महाधिवेशनमा जान्छ?
मैले त त्यो अवस्था देखेको छैन। सबै पुस १६ देखि १९ गते नियमित महाधिवेशन गरौं भन्नेमा सहमतिमा आउनुहुन्छ भन्ने लाग्छ। विशेष महाधिवेशन माग्ने पनि यो मितिमा सहमत हुने र चुनावपछि वैशाखमा महाधिवेशन भन्नेहरू पनि यो मितिमा सहमत भएर यो मिलनविन्दु जस्तो छ यो कार्यतालिका। महामन्त्री थापाले ल्याएको कार्यतालिका पार्टीभित्र एकताको मिलनविन्दुजस्तो छ।
भनेपछि केन्द्रीय समितिले यही निष्कर्ष निकाल्छ?
हो, हो पुस १६ देखि १९ गतेसम्म १५ औं महाधिवेशन गर्ने गरी जारी केन्द्रीय समिति बैठकले केही दिनमा निष्कर्ष निकाल्छ भन्ने विश्वास मलाई छ।
-1746009348.jpg)
