'हामी नेपाल' का संयोजक सुदन गुरूङले जनताको सरकार भएर पनि कतिपय पालिका प्रमुखले सहयोग र सहकार्य नगरेको बताएका छन्।
शनिबार राति आफ्नो फेसबुकमा एक भिडिओ अपिल राख्दै उनले पालिका प्रमुखले सहयोग नगरेको बताएका हुन्। कुन पालिकाले सहयोग नगरेको भन्ने खुलाएका छैनन्।
'अहिले जनताको सरकार भएर वडा, नगरपालिकामा मेयरहरूले अलिक सहकार्य नगरेको हामीले भेटायौं। धेरै बाटोहरू रोकिएका छन्। पहिरोले धेरै मानिस फसेका छन्,' उनले भने।
बिहानैदेखि 'हामी नेपाल' का सबै टोली उद्धार र व्यवस्थापनमा खटिएको उनले बताए।
'जो जो मान्छे बाटोमा अड्किनुभएको छ, यो भिडिओ देख्नुभएको छ भने विपद प्राधिकरणको नम्बर ११४९ नम्बरमा सम्पर्क गर्नुहोला,' उनले भने, 'अहिलेसम्म जति पनि देख्नुभएको छ हेलिकप्टरहरू, मन्त्रीहरू घुम्न मात्रै प्रयोग भएका छन्। आज हामीले गृहमन्त्रीसँग कुरा गरेर उद्धारका लागि प्रयोग हुनुपर्छ भनेका छौं।'
उनले हेलिकप्टर अवतरण हुनसक्ने ठाउँ पनि जानकारी गराउन अनुरोध गरेका छन्।
फसेका मानिस भएका पालिकालाई खाने-बस्ने व्यवस्थापनका लागि जानकारी गराइसकेको पनि उनले बताए।
'खान-बस्न हामीले पालिकालाई सूचना पठाइसक्यौं। तर उहाँहरूको सहकार्य राम्रो भएन भन्ने हामीले बुझ्यौं,' उनले भने।
-1746009348.jpg)
