राष्ट्रिय स्वतन्त्र पार्टी (रास्वपा) ले वैकल्पिक शक्तिहरूको मोर्चाबन्दीको प्रयास थालेको छ। बुधबार बसेको पार्टी सचिवालय बैठकबाट निर्णय गर्दै रास्वपाले वैकल्पिक राजनीतिक पक्षधर र स्वतन्त्र व्यक्तिसमेत समेटेर मोर्चा बनाउने संस्थागत पहल थालेको हो।
बुधबार पार्टी केन्द्रीय कार्यालय चःमतिमा बसेको सचिवालय बैठकले अहिलेको विषम राजनीतिक परिस्थितिमा वैकल्पिक शक्तिहरू एक ठाउँमा आउनुपर्ने निष्कर्ष निकालेको कार्यवाहक प्रवक्ता मनिष झाले जानकारी दिए।
उनका अनुसार सचिवालय बैठकले विषम राजनीतिक परिस्थितिमा वैकल्पिक राजनीति पक्षधर, अभियन्ता तथा स्वतन्त्र समूहहरूलाई एउटै धागोमा बाँध्न रास्वपाले नेतृत्व लिने र ‘सहकार्य–संवाद कार्यदल’ गठन गर्ने निर्णय गरेको छ।
अहिलेका लागि कार्यदलको संयोजक कार्यवाहक प्रवक्ता मनिष झा नै तोकिएका छन्।
‘अहिलेको लागि कार्यदल बनाइएको छ। कार्यदलको संयोजक म हो। यो कार्यदलले सुरूआती पहल गर्ने। अगाडि आवश्यकताको आधारमा नेतृत्वलाई संलग्न गराउने र आवश्यक समन्वय गर्ने योजना छ,’ उनले भने।
सचिवालय बैठकमा सभापति रवि लामिछानेमाथि झूटा र प्रतिशोधपूर्ण मुद्दा लगाइएको भन्दै त्यसबारे छलफल भएको उनले बताए।
‘वर्तमान अवस्था र भिजिट भिसा कान्डमा पार्टीको संसदीय गतिविधिबारे गहन छलफल भयो। उक्त मुद्दाविरूद्ध पार्टी एकढिक्का भएर अघि बढ्ने तथा भिजिट भिसा कान्डमा संसदमा संसदीय दलको प्रयास प्रशंसनीय रहेको ठहर गर्दै अझ सशक्त रूपमा संसदमा प्रस्तुत हुन संसदीय दललाई निर्देशन दिने निर्णय गरिएको छ,’ उनले भने।
