अमेरिकी राष्ट्रपति डोनाल्ड ट्रम्पले इलन मस्कसँग किनेको टेस्ला गाडी बेच्ने भएका छन्।
मस्कले ह्वाइट हाउस छाडेको एक सातामै उनीसँग वाकयुद्ध भएपछि ट्रम्पले मस्कसँग किनेको रातो टेस्ला गाडी बेच्न लागेका हुन्।
सामाजिक सञ्जालमा एकअर्काविरूद्ध शब्दको तिखो वाण हानाहान भएको चौबिस घन्टा नबित्दै ट्रम्पले मस्कसँग किनेको कार बेच्न लागेको ह्वाइट हाउसका एक अधिकारीले बताएका छन्।
वाकयुद्धपछि ट्रम्पले कार बेच्ने निर्णय गरिसकेको ह्वाइट हाउसका ती अधिकारीलाई उद्धृत गर्दै अमेरिकी पत्रिका द न्युयोर्क टाइम्सले लेखेको छ।
बिहीबार राष्ट्रपति ट्रम्पले सरकारी खर्च कटौतीका लागि मस्कको कम्पनीलाई दिइएको अनुदान रोक्ने र भएका सम्झौता रद्द गर्ने बताएपछि मस्कले ट्रम्पको आलोचना गरेका थिए।
उनले ट्रम्पलाई आफूले राष्ट्रपति बनाएकोदेखि महाभियोग लगाउनुपर्ने सम्मका अभियव्यक्ति एक्समार्फत दिएका थिए।
मस्कले एक्समार्फत आफूविरूद्ध आलोचनात्मक अभिव्यक्ति दिन थालेपछि ट्रम्पले पनि आफ्नो ट्रुथ सोसल अकाउन्टमा पोस्ट लेखेर जबाफ दिएका थिए।
ट्रम्पले सरकारको अर्बौं डलर बचाउनका लागि मस्कलाई दिइएको सरकारी अनुदान कटौती र सम्झौता रद्द गर्नुपर्ने बताएका थिए।
ह्वाइट हाउसमा डिपार्टमेन्ट अफ गभर्नमेन्ट इफिसियन्सी (डज प्रमुख) हुँदा मस्कले सरकारी खर्च घटाउन भनेर संघीय कर्मचारी कटौतीदेखि अन्तर्राष्ट्रिय एजेन्सीहरूलाई निष्प्रभावी पार्नेसम्मका निर्णय मस्कले गरेका थिए।
गत शुक्रबार डज प्रमुखका रूपमा आफ्नो कार्यकाल पूरा गरेर ह्वाइट हाउसबाट बाहिरिएको एक हप्ता नपुग्दै राष्ट्रपति ट्रम्पसँग मस्कको सम्बन्धमा चिसिएको हो। खर्च कटौतीका लागि उनले ट्रम्पलाई दिएको सुझाव ट्रम्पले मस्कविरूद्ध नै प्रयोग गरेको भनेर अन्तर्राष्ट्रिय सञ्चारमाध्यमहरूले लेखेका छन्।
दुई जनाबीच वाकयुद्ध भएपछि २०२६ को चुनावमा रिपब्लिकनलाई नकारात्मक असर गर्न सक्ने भनेर ह्वाइट हाउसका अधिकारीले वार्ता गराउन खोजेका पनि थिए। उनीहरूले ट्रम्प र मस्क दुवैलाई टेलिफोन संवाद गरी विवादको सुलह गराउन खोजेका थिए। तर ट्रम्प आफैले मस्कसँग वार्ताको तयारी नभएको बताएका थिए।
टेस्ला गाडीको बिक्री घटेपछि अमेरिकी राष्ट्रपति डोनाल्ड ट्रम्पले गत मार्चमा कम्पनीको व्यापार उकास्न एउटा टेस्ला गाडी किनेर विज्ञापन गरेका थिए।
टेस्ला कम्पनीका मालिक मस्कले आफ्नो समर्थन गरेका कारण उनलाई आर्थिक नोक्सानी भएकाले टेस्लाको विज्ञापनका लागि उनले सो गाडी किनेका थिए।
सुरक्षाका कारण ट्रम्पले सो टेस्ला गाडी चलाउन भने पाएका छैनन्। उनको सुरक्षाको जिम्मेवारी लिएको सिक्रेट सर्भिसेजले उनलाई टेस्लाको गाडी चलाउने अनुमति नदिएकाले ह्वाइट हाउसका कर्मचारीले सो गाडी चलाउने भनेर त्यतिबेला ट्रम्पले बताएका थिए।
ट्रम्प विद्युतीय गाडीको ट्रम्प घोर विरोध गर्थे। विद्युतीय गाडी धेरै महङ्गो हुने र चार्ज नगरी केही टाढा जान पनि नसक्ने भनेर विरोध गर्थै। सन् २०२३ को क्रिसमसको दिन त उनले सामाजिक संजालमा विद्युतीय गाडीहरू नर्कमा कुहिनु पर्छ भनेर पोस्ट नै गरेका थिए।
तर गत वर्षको निर्वाचन अघि भने मस्कले ट्रम्पको समर्थन गर्ने घोषणा गरे र प्रचार मै होमिए। मस्कको राजनीतिक गतिविधिका कारण उनको कम्पनीलाई नोक्सानी भए पछि टेस्लाको गाडी किनेर ट्रम्पले विज्ञापन गरेका थिए।
त्यतिबेला विश्वभरि टेस्लाको बिक्री घट्न थालेपछि टेस्ला कम्पनीको सेयरको भाउ एकैदिनमा १५ प्रतिशतसम्म झरेपछि ट्रम्पले मस्कको समर्थनमा आफ्नो सामजिक संजाल ट्रुथ सोसलमा आफ्ना समर्थकलाई अपिल गरेका थिए।
देशका लागि गज्जबको काम गरिरहेका मस्कलाई हानि गर्न ‘बामपन्थी बौलाहा’ ले टेस्लाको बहिस्कार अभियान चलाएको भनेर उनले आफ्ना समर्थनको ध्यानाकर्षण गराएका थिए।
अहिले मस्कसँगको सम्बन्ध चिसिएपछि ट्रम्पले फेरि टेस्ला गाडी बेच्न लागेका हन्।
उक्त गाडी अहिले ह्वाइट हाउसको प्रांगणमा राखिएको न्युयोर्क टाइम्सले जनाएको छ।
राष्ट्रपति ट्रम्प र मस्कबीच झगडा परेपछि टेस्लाको सेयरमा बिहीबार भारी गिरावट आएको थिय। त्यस दिन टेस्लाको सेयर एकैदिन १४ प्रतिशतले गिरावट आएपछि १५० अर्ब डलर बराबरको नोक्सानी ब्यहोरेको थियो।
