राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्र विरूद्धका प्रमाण संकलन भइसकेको भन्दै सर्वोच्च अदालतले हाजिरी जमानीमा छाड्न आदेश दिएको छ।
शुक्रबार न्यायाधीशहरू कुमार चुडाल र तिलप्रसाद श्रेष्ठको इजलासले हाजिर जमानीमा छाड्न आदेश दिएको हो।
सर्वोच्चले काठमाडौं जिल्ला अदालतको वैशाख १० गतेको आदेश उल्लेख गरेको छ।
‘वैशाख १० गते हिरासतमा राख्न अनुमति दिँदा नै उनीबाट संकलन गर्नुपर्न प्रमाणहरू संकलन भइसकेको अवस्था देखाई हाजिर जमानीमा छोड्न ध्यानाकर्षण गराइएको पाइन्छ,’ संक्षिप्त आदेशमा उल्लेख छ, ‘हालसम्मको अनुसन्धान तहकीकातको अवस्थालाई हेर्दा निज निवेदकसँग सम्बन्धित अधिकांश प्रमाण संकलन कार्य सम्पन्न भइसकेको देखिएको छ।’
थप प्रमाण संकलन गर्नुपर्ने भए संकलन गर्न नसकिने पनि अवस्था नरहेको सर्वोच्चले उल्लेख गरेको छ।
‘थप प्रमाण संकलन गर्नुपर्ने भए सो बमोजिम संकलन गर्न पनि नसकिने अवस्था नरहेको तर उनलाई हिरासतमै राख्नुपर्ने सम्मको अवस्था नदेखिँदा पछि मुद्दा चल्ने अवस्था आएमा वा थप प्रमाण बुझ्नुपर्ने भएमा जिल्ला प्रहरी कार्यालयले खोजी गरेका बखत उपस्थित गराउने गरी उनका कानुन व्यवसायीको जिम्मा लगाई तत्काल थुनाबाट मुक्त गरिदिनु भनी विपक्षीहरूका नाममा बन्दीप्रत्यक्षीकरणको आदेश जारी गरिदिएको छ,’ आदेशमा भनिएको छ।
तीनकुने घटनामा संलग्न रहेको आरोपमा पक्राउ परेका मिश्र ४९ दिनदेखि प्रहरी हिरासतमा थिए।
